آدرش نگر کے علاقے مول چند کالونی میں رہنے والا لڑکا راہل بی اے کا طالب علم تھا اور وہ اپنے گھر میں ہی بچوں کو ٹیوشن پڑھایا کرتا تھا اور اس کی ایک لڑکی کے ساتھ دوستی بھی تھی۔
لیکن بدھ کے روز اسے پیٹ پیٹ کر قتل کر دیا گیا جس کے بعد ہلاک شدہ راہل کے اہل خانہ نے آدرش نگر پولیس اسٹیشن میں شکایت درج کرائی ہے۔
اس معاملے میں پولیس نے قتل کا مقدمہ درج کیا ہے اور پانچ لوگوں کی گرفتاری بھی عمل میں آئی ہے جس میں دو ملزم بالغ اور تین ملزم نابالغ ہیں۔
اس واقعہ سے متعلق ایک سی سی ٹی وی فوٹیج بھی منظر عام پر آئی ہے جہاں چند لڑکے ایک لڑکی کو زبردستی راستے پر سے کھینچتے ہوئے لے جارہے ہیں۔ بتایا جارہا ہے کہ لڑکی کے جاننے والوں نے ہی راہل کو قتل کیا ہے۔
اس معاملے میں راہل کے چاچا نے بتایا کہ واقعہ کے تین روز گزرجانے کے بعد بھی دہلی حکومت کی جانب سے کوئی ردعمل سامنے نہیں آیا ہے، حالانکہ راہل کی آخری رسومات ادا کرنے والے دن علاقے کے رکن اسمبلی پون شرما شمشان گھاٹ پہنچے تھے لیکن ابھی تک دہلی حکومت کا کوئی نمائندہ ان سے ملنے کے لیے نہیں آیا ہے۔
