ہم دہلی کے امن میں خلل ڈالنے نہیں بلکہ اس کی حفاظت کے لیے آئے ہیں: امریندر

پنجاب کے وزیر اعلیٰ کیپٹن امریندر سنگھ نے کہا ہے کہ وہ دہلی میں مرکز کے ساتھ تصادم نہیں بلکہ غریب کسانوں کے انصاف کی خاطر آئے ہیں جن کی روزی روٹی مرکزی زرعی قوانین کے سبب خطرے میں پڑی ہوئی ہے۔

کیپٹن امریندر سنگھ نے آج دہلی میں جنتر منتر پر دھرنے کے دوران کہا کہ وہ یہاں امن میں خلل ڈالنے نہیں بلکہ اس کی حفاظت کے لیے آئے ہیں۔ انہوں نے کہا،’ ہمیں اور پنجاب کے اراکین اسمبلی کو دہلی میں دھرنا دینے کے لیے مجبور کیا گیا کیونکہ صدر نے ان سبھی سے ملاقات کا وقت نہیں دیا اور ان کی ملاقات کو اس بنیاد پر رد کر دیا کہ ریاست کے زرعی ترمیمی بل ابھی گورنر کے پاس ہیں۔

انہوں نے بتایا کہ خواہ ان کا پہلا پروگرام راج گھاٹ پر سلسلہ وار دھرنا دینے کا تھا لیکن بعد میں اسے جنتر منتر پر منتقل کرنا پڑا کیونکہ دہلی پولیس نے گاندھی جی کی سمادھی راج گھاٹ پر دفعہ 144 لگا دی ہے۔

وزیر اعلیٰ نے کہا کہ وہ جانتے ہیں کہ گورنر اس میں کچھ نہیں کریں گے۔ اسی سبب وہ قومی سلامتی اور فوڈ سکیورٹی سے متعلق پنجاب کی مشکل سے صدر کو اگاہ کرنے کے مقصد سے ملنا چاہتے ہیں۔ انہوں نے امید کا اظہار کیا کہ صدر پنجاب اسمبلی میں پاس زرعی قوانین سے اتفاق کریں گے۔