وزیر داخلہ امیت شاہ نے رکن پارلیمان عبدالخالق کے ایک سوال کے جواب میں پارلیمنٹ میں بتایا کہ آسام واحد ریاست ہے جہاں 6 حراستی مراکز ہیں اور وہاں 1043 غیر ملکی موجود ہیں جن میں سے 1026 بنگلہ دیشی اور 18 روہنگیائی ہیں۔
رکن پارلیمان عبدالخالق نے حکومت کے پیش کردہ اعداد و شمار پر شبہ ظاہر کرتے ہوئے کہا کہ جس طرح سے میرے سوال کے جواب میں بنگلہ دیشی اور روہنگیائی کی شناخت دی گئی ہے وہ مشکوک ہے کیونکہ کسی کو غیر ملکی ثابت کرنے اور اسے بنگلہ دیشی اور روہنگیائی قرار دینے میں بہت فرق ہے۔ جب ان کی شہریت کے بارے میں پتہ چل چکا ہے کہ وہ کس ملک سے ہیں تو انہیں حراست میں رکھنے کا کیا مطلب ہے۔ انہیں ان کے ملک بھیج دیا جائے۔
عبدالخالق نے شہریت ترمیمی بل کو مذہبی جانبداری پر پیش کرنے کو افسوسناک قرار دیتے ہوئے بی جے پی پر حملہ بولا۔ انہوں نے کہا کہ بی جے پی کہتی ہے کہ ایک ملک ایک قانون لیکن جب شہریت کی بات آتی ہے تو مسلمانوں کے لیے الگ قانون اور غیر مسلموں کے لیے الگ قانون کی بات کیوں کرتی ہے۔
