منیش سِسودیا نے کہا کہ 'بچوں کی تعلیم ان کے کلاس رومز میں معمول کے مطابق دوبارہ شروع ہوئی ہے۔ بارش کے باوجود بچے اسکول آئے جس سے ظاہر ہوتا ہے کہ بچے اسکول کُھلنے کا انتظار کر رہے تھے۔
انہوں نے کہا ہلاکت خیز 'وبا کی وجہ سے اسکول گزشتہ ڈیڑھ سال سے بند تھے۔ اس دوران بچوں کی تعلیم کو بہت نقصان پہنچا ہے۔ ہم بچوں کی صحت کے ساتھ ساتھ ان کی تعلیم کے بارے میں بھی فکر مند ہیں۔ اگر ابھی سکول اور کالج نہیں کھولے گئے تو ایک پوری نسل 'نالج گیپ' کے ساتھ آگے بڑھے گی۔
منیش سِسودیا نے کہا کہ ہم مکمل الرٹ موڈ میں ہیں۔ تمام اسکولوں میں اس بات کو یقینی بنایا جائے گا کہ کورونا سے متعلق پروٹوکول اور سماجی دوری پر عمل کیا جائے۔ پہلے دور کے تجربات کی بنیاد پر اسکول کو دوسری کلاسوں کے لیے کھولنے کا فیصلہ کیا جائے گا۔
نائب وزیراعلیٰ نے مزید کہا کہ حکومت، افسران اور اسکول انتظامیہ مکمل طور پر الرٹ ہے۔ اس بات کو یقینی بنایا جائے گا کہ تمام اسکول کورونا پروٹوکول اور سماجی دوری پر عمل کریں۔
انہوں نے کہا کہ اب 50 فیصد صلاحیت کے ساتھ اسکول کھولے جا رہے ہیں لیکن جب پروٹوکول پر عمل کرنا بچوں کی عادت بن جائے گی تو اسکول پوری صلاحیت کے ساتھ کھولے جائیں گے۔
