قومی داراحکومت دہلی متصل شہر نوئیڈا سمیت مختلف مقامات میں بوندا باندی نے موسم خوشگوار بنا دیا ہے۔
ضلع بھر میں تیز ہواﺅں کے ساتھ بارش نے موسم سہانا بنا دیا، یہ تو موسم کے خوبصورت پہلو کا ذکر تھا، لیکن اس بارش نے ایک دن قبل نوئیڈا اتھارٹی کے دعوے کی پول کھول دی تھی، جب آبی نکاسی نہ ہونے سے بعض سیکٹر تالاب کی شکل اختیار کر گئے۔
آج بھی کچھ ایسا ہی نظارہ دیکھنے کو ملا، پانی کی نکاسی کا مسلہ ہنوز برقرار ہے، لیکن آج ایک اور بڑا حادثہ پیش آیا جس سے ایک بار پھر نوئیڈا اتھارٹی اور مقامی انتظامیہ کو ہزیمت اٹھانی پڑی۔
شدید بارش کے باعث سیکٹر 10 کے نالے کی دیوار منہدم ہوگئیں، وہاں کار کا شو روم ہے، جہاں پر گاڑیوں کی سروس بھی ہوتی ہے،وہاں ریلنگ سمیت پوری دیوار ہی گر پڑی۔
خوش قسمتی سے کسی جانی نقصان کی خبر نہیں ہے، لیکن نالے کی دیوار گر نے سے مقامی انتظامیہ کی نااہلی سامنے آئی ہے۔
خیال رہے کہ حکومت کی جانب سے بارش کی آمد سے قبل کسی بھی طرح کی پلاننگ نہیں کی گئی تھی، جس کے نتائج اب برآمد ہو رہے ہیں، غنیمت یہ رہی کہ اس وقت اس مقام پر کوئی موجود نہیں تھا ورنہ وہ نالے میں بہہ جاتا۔
