دارالحکومت دہلی میں ڈلائٹ سنیما کے قریب ایک تیز رفتار کار سوار نے نشہ کی حالت میں رکشا کو کچل دیا۔ اس دوران رکشا میں سوار خاتون اور رکشا چلانے والے شخص کی موقع پر ہی موت ہو گئی جبکہ دو بچے زخمی ہو گئے، جنہیں رام منوہر لوہیا ہسپتال میں داخل کرایا گیا ہے۔
یہ واقعہ تقریبا رات 10:30 بجے دہلی گیٹ کے قریب پیش آیا۔ سفید رنگ کی کار جس کا نمبر hr26bc2297 ہے۔ اس کار کا ڈرائیور نشہ کی حالت میں کار چلا رہا تھا اسی دوران وہ کار کی رفتار پر قابو نہ پا سکا اور رکشا کے پرخچے اڑاتا ہوا آگے نکل گیا۔ حادثے کے بعد بھی کار سوار نہیں رکا اور بھاگنے کی کوشش کی لیکن پولیس نے اسے گرفتار کر لیا۔
خاتون اور رکشا چلانے والے شخص کی لاش کو پوسٹ مارٹم کے لیے لوک نائک جے پرکاش ہسپتال میں بھیجا گیا ہے۔ بتایا جا رہا ہے کہ مرنے والی خاتون پہاڑی بھوجلا کی رہنے والی تھی جو اپنے بچوں کے ساتھ رکشا سے سفر کر رہی تھی۔
