ارب پتی جوڑے بل گیٹس اور میلنڈا گیٹس نے شادی کے 27 سال بعد پیر کو ایک مشترکہ بیان میں کہا کہ 'انہوں نے اپنی شادی ختم کرنے کا فیصلہ کیا ہے'۔
دونوں نے مشترکہ طور پر کہا ہے کہ ''ہمارے نزدیک اب ہم ایک دوسرے کے ساتھ رہتے ہوئے ترقی نہیں کر سکتے۔''
بل گیٹس اور میلنڈا کی جانب سے مشترکہ طور پر سوشل میڈیا ٹویٹر پر جاری کیے گئے بیان میں کہا گیا ہے کہ 'بہت زیادہ سوچ، غور و فکر اور اپنے رشتے پر بہت زیادہ کام کرنے کے بعد ہم نے اپنی شادی کو ختم کرنے کا فیصلہ کیا ہے۔'
دونوں کی ملاقات سال 1980 کے آخر میں ہوئی تھی، جب میلنڈا نے بل گیٹس کی کمپنی مائیکروسافٹ میں نوکری کا آغاز کیا تھا۔ ان کے تین بچے ہیں۔
ان کی جانب سے ٹویٹر پر پوسٹ کیے جانے والے اعلامیے میں لکھا ہے کہ 'گذشتہ 27 سالوں کے دوران ہم نے تین قابلِ فخر بچوں کی پرورش کی ہے اور ایک ایسی فاؤنڈیشن بنائی ہے جو دنیا بھر میں کام کرتی ہے اور لوگوں کو صحت مند اور سود مند زندگی گزارنے میں مدد کر رہی ہے۔'
بل گیٹس دنیا کے امیر ترین افراد کی فہرست میں چوتھے نمبر پر ہیں۔ ان کی کل دولت 124 ارب کے قریب ہے۔
انھوں نے یہ دولت 1970 کی دہائی میں مشترکہ طور پر قائم کی جانے والی دنیا کے سب سے بڑی سافٹ ویئر کمپنی مائیکروسافٹ کے ذریعے کمائی۔
