'ملک کے داخلی معاملات میں بیرونی مداخلت کی گنجائش نہیں'

نائب صدرجمہوریہ ایم وینکیا نائیڈو نے ملک کے داخلی معاملات میں غیر ملکی اداروں کی بڑھتی ہوئی دخل اندازی پر تشویش ظاہرکرتے ہوئے کہا ہے کہ ستر سال پرانے بھارتی نظام حکومت اپنے شہریوں کے سروکاروں کو دیکھنے کےلیے پوری طرح سے اہل ہے اور اس میں بیرونی مداخلت کی کوئی گنجائش نہیں ہے۔

نائیڈو نے ایک کتاب ’ٹی آر جی این اینگما‘کا اجرا کرتے ہوئے کہا کہ غیر ملکی ادارے ان معاملوں میں مداخلت کررہے ہیں جو پوری طرح سے بھارتی پارلیمنٹ اور حکومت ہند کے دائرہ اختیار میں ہیں۔

انھوں نے ان اداروں کی ایسی حرکتوں کوغیر ضروری اور بلاجواز قراردیتے ہوئے امیدظاہر کی کہ مستقبل میں یہ ادارے ان سے دوررہیں گے ۔

نائب صدرجمہوریہ ایم وینکیا نائیڈو نے کہاکہ ایک پختہ اور جمہوری نظام حکومت ہونے کی وجہ سے بھارت اپنے شہریوں کے سروکاروں کا خیال رکھنے کا اہل ہے اور اسے ایسے معاملوں میں کسی کی صلاح یا ہدایت کی ضرورت نہیں ہے ۔

نائیڈو نے کہا ہے کہ 70سال کے تجربہ کی وجہ سے ہم نے بہت سے چیلنجوں کا کامیابی کےساتھ سامنا کیاہے ۔اب ہم پہلے کے مقابلہ زیادہ متحدہیں اور اس سلسلہ میں کسی کو تشویش میں مبتلاہونے کی ضرورت نہیں ہے'۔

نائب صدرجمہوریہ ایم وینکیا نائیڈو خطاب کرتے ہوئے

بھارتی جمہوریت کی شکل میں 70سال کا سفر مکمل کرنے کے لیے لوگوں کو مبارک باد دیتے ہوئے نائب صدر جمہوریہ نے کہاکہ ایک ملک کے طورپر بھارت ہمیشہ اپنے شہریوں کے لیے انصاف،آزادی اور مساوات کے لیے پرعزم ہے ۔

نائیڈو نے کہاکہ 'ملک کا نظام حکومت اور جمہوری نظام شہریوں کو اختلافات اور عدم اتفاق کو ظاہر کرنے کا مناسب موقع دیتاہے۔

انھوں نے ایمرجنسی کا ذکر کرتے ہوئے کہاکہ جب بھی بنیادی حقوق پامال کرنے کی کوشش ہوئی ہے تو شہریوں نے متحد ہوکر ایک ساتھ آواز بلندکی ہے اور اسکی حفاظت کی ہے ۔اس کے نتیجہ میں ہندستانی جمہوریت مزید مضوط ہوئی ہے ۔