'معیشت بچانے کے لیے حکومت سنجیدہ اقدامات کرے'

کانگریس کی صدر سونیا گاندھی نے کورونا کے خلاف جاری جنگ میں معیشت کی بگڑتی صورتحال کو بڑا چیلنج قرار دیتے ہوئے وزیر اعظم نریندر مودی سے کہا ہے کہ اسے پٹری پر لانے کے لیے سنجیدہ کوششیں کرنے کی ضرورت ہیں۔

کانگریس کی صدر سونیا گاندھی نے وزیر اعظم نریندر مودی کو اس معاملے میں ایک خط لکھا اور کہا کہ کورونا کو پھیلنے سے روکنے کے لیے گزشتہ پانچ ہفتوں سے جاری لاک ڈاؤن کی وجہ سے ملک کے سامنے کئی چیلنج پیدا ہوگئے ہیں۔

کووڈ۔19 کے خلاف اس جنگ میں ہماری معیشت ایک مسئلہ بن گئی ہے جس پر فوری توجہ دے کر اسے حل کرنے کی سخت ضرورت پر زور دیا۔

کانگریس کی صدر سونیا گاندھی

انہوں نے وارننگ دی کہ اگر اس مسئلہ کو نظرانداز کر دیا گیا تو ملک کی معیشت پر اس کے نہایت سنگین اثرات ہوں گے اور اس سے نمٹنا حکومت کے لیے بڑا چیلنج بن جائے گا۔ انہوں نے حکومت کو مشورہ دیا کہ اس بحران سے نمٹنے کے لیے سب سے پہلے چھوٹے، مائیکرو اور متوسط صنعتوں (ایم ایس ایم ای) میں جان پھونکنے کی ضرورت ہے اور اس کے لیے ایک لاکھ کروڑ روپے کے ’کریڈیٹ گارنٹی فنڈ‘ کی تشکیل کرکے اس شعبہ میں فوری لیکوڈیٹی لانے اور صنعتوں کو ضرورت پڑنے پر مناسب سرمایہ فراہم کرانے کا نظم کرنا چاہئے۔