شمال مشرقی دہلی کے شو وہار میں رہنے والے شاہد 25 فروری کی شام اپنے اہل خانہ کے ساتھ عشائیہ کے بعد بیٹھے ہوئے تھے تبھی کچھ لوگ ان کے گھر میں زبردستی داخل ہو گئے۔
جیسے ہی شاہد کچھ سمجھ پاتے اس سے قبل ہی بلوائیوں نے ان پر حملہ کردیا۔ اس دوران شاہد کی اہلیہ اور تین چھوٹے بچے اپنی جان بچانے کے لیے مکان سے بھاگتے ہوئے باہر نکل آئے۔
اب 13 روز سے شاہد کی اہلیہ اپنے بچوں کے والد کا انتظار کر رہی ہیں لیکن شاہد کا کچھ بھی پتہ نہیں چل رہا۔
شاہد کی بیوی سے ای ٹی وی بھارت کے نمائندے نے بات کی اس دوران انہوں نے بتایا کہ ایک برس قبل ہی انہوں نے شو وہار میں اپنا آشیانہ بسایا تھا جسے بلوائیوں نے چند لمحوں میں ہی اجاڑ دیا۔
شاہد کی عمر 35 برس ہے وہ درزی کا کام کیا کرتے تھے اس دوران جب ان کے گھر پر حملہ کیا گیا تو جو سامان تیار رکھا تھا بلوائیوں نے اسے بھی جلا کر راکھ کر دیا اب تین بچے اور شاہد اہلیہ دہلی کے تمام ہسپتالوں میں چکر لگا کر پریشان ہو چکی ہے لیکن انہیں امید ہے کہ شاہد واپس آ جائیں گے۔
