قومی دارالحکومت دہلی سے متصل صنعتی شہر نوئیڈا کے دوست پور منگراؤلی کے سیکٹر 167 میں یاقوت پور شاہراہ پر بھاردواج ٹیوب ویل کے پاس آج صبح کھیت میں ایک خاتون کی لاش مشتبہ حالت ملی ہے، تاہم ایسا مانا جارہا ہے کہ اس خاتون کا قاتل خود اس کا شوہر ہی ہے۔
پولیس نے بھی موقع پر پہنچ کر صورتحال کا جائزہ لیا، اس موقع پر لواحقین نے بتایا کہ متوفیہ خاتون تارا اپنے کنبہ کے ساتھ کھیتوں میں مونجھ (دھان) لگانے کا کام کرتی تھی، تاہم اس کا شوہر گلچھا شراب پیتا ہے۔
جبکہ گاؤں والوں کا کہنا ہے کہ تارا بھی شراب پیتی تھی، تاہم شوہر اور بیوی کل شام جب کھیتوں سے کام کرکے واپس آئے اس وقت بھی نشے میں تھے، دونوں میں کسی معاملہ پر تکرار بھی ہوئی تھی۔
کنبہ کے مطابق گلچھا نے اپنی نابالغ بیٹی کا رشتہ کہیں طے کر رکھا تھا، جبکہ نابالغ لڑکی نے اس رشتہ سے انکار کردیا تھا، تاہم اس کی ماں تارا بھی رشتہ کے حق میں نہیں تھی۔
گلچھا اس پر شادی کے لیے دباؤ ڈال رہا تھا، اور کہا جارہا ہے کہ اسی وجہ سے شرابی شوہر نے اسے رات کے وقت کھیت میں مار ڈالا اور وہیں پھینک دیا۔
تھانہ ایکسپریس وے کی پولیس نے کیس درج کرکے معاملے کی تحقیقات کررہی ہے اور ملزم کو سزا دینے کے لیے شواہد اکٹھا کررہی ہے۔
واضح رہے کہ ان کا تعلق بہار سے بتایا جا رہا ہے۔
