دہلی کے منگول پوری میں بی جے پی کارکن رنکو شرما کے قتل کے بعد اس معاملے میں سیاست اتنی تیز ہوگئی ہے کہ صبح سے ہی دائیں بازو کی شدت پسند تنظیموں اور بی جے پی کے متعدد رہنماؤں کا دورہ جاری رہا۔ ان رہنماوں کے متواتر دورے سے علاقے میں کشیدگی کی خبریں آ رہی ہیں۔ کسی طرح کا ناخوشگوار واقعہ نہ ہو اس کے لیے پولیس کے اعلی افسران خود معائنہ کرنے کیلئے جائے وقوع پر پہنچ گئے ہیں۔
علاقے میں امن و امان کو برقرار رکھنے کے لئے ڈرون کے ذریعے نگرانی کی جا رہی ہے۔ اس کے ساتھ ہی علاقے میں سکیورٹی فورسز کے کئی دستے بھی تعینات کردیئے گئے ہیں تاکہ کوئی ناخوشگوار واقعہ پیش نہ آئے۔
واضح رہے کہ بدھ کی رات کچھ لوگوں نے رنکو شرما نامی ایک مقامی نوجوان کو آپسی جھگڑے میں چاقو مار کر زخمی کردیا تھا۔ اسے آناً فاناً میں ہسپتال میں داخل کرایا گیا جہاں زخموں کی تاب نہ لاکر وہ چل بسا۔
ذرائع کے مطابق اس معاملے میں اب تک مجموعی طور پر پانچ افراد کو گرفتار کیا گیا ہے۔ پولیس مزید کارروائی میں مصروف ہے۔ کچھ عناصر اس معاملے کو ایک دوسرا رخ دینے کی کوشش کر رہے ہیں لیکن پولیس نے واضح طور پر کہہ دیا ہے کہ یہ معاملہ محض آپسی جھگڑے کا ہے جس میں بدقسمتی سے اس کی جان چلی گئی۔
