شہریت ترمیمی قانون کے خلاف دہلی کے شاہین باغ میں ہونے والا احتجاج ایک بار پھر سے موضوع بحث بنا ہوا ہے اور اس بار عام آدمی پارٹی کے رہنما سوربھ بھاردواج نے احتجاج کے بارے میں بی جے پی کو ہدف تنقید بنایا ہے۔
عام آدمی پارٹی کے ترجمان سوربھ بھاردواج نے ای ٹی وی بھارت سے بات کرتے ہوئے بتایا کہ 'دہلی میں اگر کوئی بھی شخص احتجاج کرتا ہے تو دہلی پولیس اس کی اجازت نہیں دیتی ہے تو پھر تین ماہ سے زائد وقت تک کس طرح شاہین باغ کا احتجاج چلا۔
اس دوران سوربھ بھاردواج نے بی جے پی رہنماؤں کے ذریعے دیئے بیانات کا بھی ذکر کرتے ہوئے ان پر تنقید کی۔
جب ای ٹی وی بھارت نے شاہین باغ پر دہلی کے نائب وزیراعلیٰ منیش سسودیا کی اس بات کا ذکر کیا جس میں سسودیا نے کہا تھا کہ وہ شاہین باغ احتجاج کی حمایت کرتے ہیں' تو اس بات پر سوربھ بھاردواج نے کہا کہ 'ہم نے ہمیشہ شاہین باغ احتجاج کو لاء اینڈ آرڈر کو معاملہ کہا ہے۔
انہوں نے کہا کہ 'دہلی پولیس چاہتی تو ایک ہی دن میں احتجاج ختم کرواسکتی تھی لیکن مرکزی حکومت خود چاہتی تھی کہ یہ احتجاج ختم نا ہو۔
