اطلاعات کے مطابق سنیل کوٹھاری گزشتہ نومبر میں کووڈ 19 سے متاثر ہوگئے تھے اور انہیں اسپتال میں داخل کرایا گیا تھا۔ تاہم بعد ازاں وہ ٹھیک ہوکر گھر آگئے تھے لیکن کل رات انہیں دل کا دورہ پڑا تو انہیں پھر سے اسپتال میں داخل کرایا گیا جہاں صبح تقریباً 9 بجے انہوں نے آخری سانس لی۔
پدم شری یافتہ رقاصہ گیتا چندرن، شوبھنا نارائن اور ملکہ سارا بائی سمیت رقص کی دنیا کی مشہور شخصیات نے ڈاکٹر کوٹھاری کے انتقال پر گہرے رنج کا اظہار کیا ہے اور اس سانحہ کو بھارتی کلاسیکی رقص کی دنیا کا بڑا نقصان بتایا ہے۔
بیس دسمبر سنہ 1933 کو ممبئی میں پیدا ہوئے ڈاکٹر کوٹھاری پیشہ سے چارٹرڈ اکاؤنٹنٹ تھے لیکن رقص سے لگاؤ کے سبب وہ اس شعبے سے وابستہ ہوگئے۔ انہوں نے بھارتی کلاسیکی رقص پر 20 کتابیں تحریر کیں۔ وہ ممبئی میں معروف انگریزی ادیب ملک راج آنند کے دوست بھی تھے۔ انہوں نے بڑودا یونیورسٹی میں رقص شاستر میں پی ایچ ڈی کی۔ پھر وہ وشو بھارتی یونیورسٹی میں پروفیسر بن گئے۔ انہوں نے فل برائٹ اسکالر شپ پر امریکہ کی نیویارک یونیورسٹی میں بھی تعلیم دی۔ انہیں سنہ 1995 میں رقص کے فروغ میں تعاون دینے کے لئے سنگیت ناٹک اکیڈمی ایوارڈ سنہ 2001 میں پدم شری سے نوازا گیا۔ انہوں نے ادے شنکر اور رکمنی ارونڈیل پر فوٹو بُک بھی شائع کی تھی۔
