دہلی اسمبلی میں اپوزیشن رہنما رام ویر سنگھ بدھوڑی نے دارالحکومت دہلی میں کورونا مریضوں کے علاج کے لئے تمام سہولیات سے آراستہ 19 ہزار بیڈ مہیا کرانے پر مرکزی وزیر داخلہ امت شاہ کا شکریہ ادا کیا ہے۔
ان میں 10 ہزار بیڈ چھتر پور کے بھاٹی مائنس واقع رادھا سوامی ستسنگ بیاس، آٹھ ہزار بیڈ ریلوے کے ڈبوں میں اور ایک ہزار ڈی آر ڈی او و ٹاٹا ٹرسٹ کے ذریعہ بنائے جا رہے اسپتالوں میں دستیاب ہوں گے۔
شاہ کو بدھ کے روز بھیجے ایک خط میں اپوزیشن رہنما نے دہلی میں کورونا کو قابو کرنے کے لئے کئے گئے اقدامات کا شکریہ ادا کیا۔ انہوں نے کہا کہ شاہ نے دہلی کورونا مریضوں کے علاج کے لئے نہ صرف بیڈ دستیاب کرائے ہیں، بلکہ ان کی ہدایات کے بعد نجی اسپتالوں میں کورونا مریضوں کے علاج کی قیمت دو تہائی تک کم کی گئی اور جانچ کی قیمت بھی 2400 روپے تک کی گئی ہے۔ اس کے علاوہ کورونا کی جانچ کے لئے مفت اینٹی زین ٹیسٹنگ بھی ان کی ہی ہدایات کے بعد شروع کی گئی۔
بدھوڑی نے اپنے خط میں امت شاہ کا شکریہ ادا کرتے ہوئے کہا کہ یہ بہت اچھی بات ہے کہ رادھا سوامی ستسنگ بیاس کے 10 ہزار بیڈ کے اسپتالوں کی نگرانی ہند تبت سرحد پولیس (آئی ٹی بی پی) کے جوان کریں گے اور یہ اسپتال 26 جون سے شروع ہو جائے گا، اسی طرح ریل کے ڈبوں میں بنائے گئے بیڈ اور ڈی آر ڈی او اور ٹاٹا ٹرسٹ کے اسپتال بھی مسلح دستوں کی دیکھ ریکھ میں کورونا مریضوں کے لئے دستیاب ہوں گے۔
