نئی دہلی: عام آدمی پارٹی (اے اے پی) کے سشیل کمار گپتا کے بدھ کے روز ٹماٹر کا مالا پہن کر ایوان میں آنے پر راجیہ سبھا کے چیئرمین ناراض ہوگئے اور انہوں نے ایوان کی کارروائی دوپہر 2 بجے تک ملتوی کر دی۔ کارروائی شروع ہونے کے تھوڑی دیر بعد مسٹر گپتا ٹماٹروں کا مالا پہن کر ایوان میں داخل ہوئے۔ اس کے بعد چیئرمین جگدیپ دھنکھڑ نے کہا کہ ایوان میں ارکان کے طرز عمل کی ایک حد ہوتی ہے۔ اس سے انہيں تکلیف ہوئی ہے۔ اس کے بعد انہوں نے ایوان کی کارروائی دو بجے تک ملتوی کر دی۔
قبل ازیں اپوزیشن پارٹیوں کے ارکان نے منی پور کے معاملے پر ہنگامہ کیا۔ بعد ازاں ایوان میں قائد حزب اختلاف ملک ارجن کھڑگے نے کہا کہ بابائے قوم مہاتما گاندھی کے پڑپوتے اور معروف مصنف تشار گاندھی کو آج صبح ہی گرفتار کر لیا گیا ہے۔ انہوں نے کہا کہ ایک طرف ایوان میں مجاہدین آزادی کو خراج عقیدت پیش کیا جا رہا ہے۔ دوسری طرف اس قسم کے واقعات رونما ہو رہے ہیں۔ قبل ازیں چیئرمین نے کہا کہ اس دن مہاتما گاندھی نے ہندوستان چھوڑو تحریک شروع کی تھی جس کی وجہ سے ملک آزاد ہوا۔ انہوں نے کہا کہ اس سے حوصلہ ملتا ہے کہ مل کر کام کرنے اور ثابت قدم رہنے سے مقصد حاصل کیا جا سکتا ہے۔ ہندوستان چھوڑو تحریک آج بھی معنی خیز ہے۔
مزید پڑھیں: حیدرآباد میں ٹماٹر کی قیمتوں میں اضافہ
انہوں نے عوام سے اپیل کی کہ وہ ملک کے اتحاد کو برقرار رکھیں اور جوش و جذبے سے قوم کی خدمت کریں۔ بعد ازاں اراکین نے ملک کے لیے اپنی لازوال قربانیاں دینے والے شہداء کے اعزاز میں خاموشی اختیار کر کے شہداء کو خراج عقیدت پیش کیا۔ دھنکھڑ نے ملک کے کھلاڑیوں کو ورلڈ یونیورسٹی اسپورٹس چمپئن شپ میں کامیاب کارکردگی کے لیے مبارکباد دی اور ان کے روشن مستقبل کی تمنا ظاہر کی۔ انہوں نے کہا کہ یہ مقابلہ چین میں منعقد کیا گیا تھا جس میں ہندوستانی کھلاڑیوں نے شاندار کامیابیاں حاصل کی ہیں۔ انہوں نے کہا کہ ہندوستانی کھلاڑیوں نے 31 کھیلوں کے مقابلوں میں حصہ لیا اور 26 تمغے جیتے جو ان کھیلوں میں اب تک کی بہترین کارکردگی ہے۔ انہوں نے کہا کہ دیگر تمغوں کے علاوہ اس کھیل میں کھلاڑیوں نے 11 گولڈ میڈل جیتے ہیں۔
یو این آئی
