نئی دہلی: کانگریس لیڈر راہل گاندھی نے جمعہ کو وزیر اعظم نریندر مودی کے لوک سبھا میں این ڈی اے حکومت کے خلاف اپوزیشن کی تحریک عدم اعتماد کے جواب پر ناراضگی اور افسوس کا اظہار کیا۔ راہل گاندھی نے پریس کانفرنس میں کہا کہ پی ایم مودی نے پارلیمنٹ میں تقریباً 2 گھنٹے 13 منٹ تک تقریر کی اور آخر میں انہوں نے منی پور پر صرف 2 منٹ تک بات کی۔ جبکہ منی پور مہینوں سے جل رہا ہے، لوگ مارے جا رہے ہیں، عصمت دری ہو رہی ہے لیکن وزیر اعظم ہنس رہے تھے، لطیفے سنا رہے تھے، یہ بھارت کے وزیر اعظم کو زیب نہیں دیتا۔
دراصل گزشتہ روز وزیر اعظم نریندر مودی نے لوک سبھا میں تحریک عدم اعتماد پر جواب دیا۔ اس دوران وزیر اعظم نے کانگریس پر شدید تنقید کی اور شمال مشرقی ریاست کی صورتحال کے لیے بڑی پرانی جماعتوں کو ذمہ دار ٹھہرایا تھا۔ کانگریس لیڈر نے افسوس کا اظہار کرتے ہوئے کہا کہ وزیر اعظم نے ریاست منی پور کا مذاق اڑایا، نریندر مودی کو دیکھنا افسوسناک ہے کہ وہ میرے نمائندے ہیں۔ ان کی تقریر بھارت کے بارے میں نہیں تھی بلکہ نریندر مودی کے بارے میں تھی۔
انھوں نے یہ بھی کہا کہ وزیراعظم کے ہاتھ میں طاقت ہوتی ہے لیکن وہ کچھ نہیں کر رہے، میں حیران ہوں کہ وہ ہنس رہے ہیں۔ پارلیمنٹ کے بیچ میں بیٹھے وزیراعظم بے شرمی سے ہنس رہے تھے۔ مسئلہ کانگریس یا میں نہیں تھا، مسئلہ یہ تھا کہ منی پور میں کیا ہو رہا ہے اور اسے کیوں نہیں روکا جا رہا ہے۔ راہل گاندھی نے کہا کہ ان کے یہ ریمارکس کہ وزیر اعظم نریندر مودی اور وزیر داخلہ امیت شاہ نے منی پور میں بھارت ماتا کا قتل کیا کوئی کھوکھلے الفاظ نہیں تھے۔ حقیقت میں انھوں نے منی پور میں بھارت کا قتل کیا ہے۔ راہل گاندھی کے مطابق ہندوستانی فوج، جس پر انہیں پورا بھروسہ ہے، دو تین دن میں منی پور میں امن قائم کر سکتی ہے لیکن مرکز انھیں تعینات نہیں کر رہا ہے۔
یہ بھی پڑھیں:
- مودی نے ایوان کو انتخابی ریلی کے طور پر استعمال کیا، کھڑگے
- لوک سبھا میں عدم اعتماد تحریک پر وزیراعظم مودی کی تقریر
راہل نے کہا کہ 'وزیراعظم کم از کم منی پور جا سکتے تھے، وہاں کی برادریوں سے بات کرتے اور کہتے کہ میں آپ کا پی ایم ہوں، چلیں بات شروع کریں لیکن مجھے کوئی ارادہ نظر نہیں آ رہا ہے، سوال یہ نہیں ہے کہ کیا پی ایم مودی 2024 میں پی ایم بنیں گے، سوال منی پور کا ہے جہاں بچے اور لوگ مارے جا رہے ہیں۔ کانگریس کے سابق سربراہ راہول گاندھی نے کہا کہ وزیر اعظم جب وزیر اعظم بن جاتا ہے تو پھر وہ سیاستدان بننا چھوڑ دیتا ہے کیونکہ وہ ملک کی آواز کا نمائندہ بن جاتا ہے، اس لیے وزیر اعظم کو سیاست دان کے طور پر نہیں بلکہ ایک ایسے وزیر اعظم کے طور پر بولنا چاہیے جس کے پیچھے بھارتی عوام کا درد ہو، دراصل وزیر اعظم سمجھ نہیں پا رہے ہیں کہ وہ اصل میں کیا ہیں۔
