ریاست اترپردیش میں عالمی وبا کے دوران وزیراعظم نریندر مودی کے پارلیمانی حلقہ وارانسی میں بہت ساری نجی تنظیموں نے ضرورت مند لوگوں کو کھانا کھلانے اور ان کا پیٹ بھرنے کا کام کیا اور ساتھ ہی ان کولوگوں کو ماسک، سینیٹائزر اور ضرورت کی چیزیں بھی مہیا کرائیں۔
ان تمام باتوں کو پیش نظر رکھتے ہوئے وزیراعظم نریندر مودی نے نو جولائی کو بنارس میں جتنی بھی نجی تنظیموں نے ضلع انتظامیہ کی مدد سے عوام کا تعاون کیا تھا ان سبھی سے مودی نے ویڈیو کانفرنسنگ کے ذریعے بات چیت کی اور ان سب کی ستائش کی۔
واضح رہے کہ وزیراعظم نریندر مودی نے تمام نجی اداروں کو شکریہ کا خط بھیجا ہے۔ اس میں ہر ادارے کا ذاتی نام لیتے ہوئے انھوں نے مبارکباد پیش کی ہے۔
وزیراعظم نریندر مودی کی جانب سے خط ملنے پر نندینی فاؤنڈیشن کے صدر ابھے شنکر تیواری بھی بہت خوش ہیں۔
ای ٹی وی بھارت سے خصوصی گفتگو کرتے ہوئے ابھے شنکر تیواری نے کہا کہ بدھ کے روز مجھے وزیراعظم کا خط موصول ہوا۔ مجھے یہ خط دیکھ کر اور پڑھ کر بہت خوشی ہوئی ہے کہ ہمارے رکن پارلیمنٹ اور ملک کے وزیراعظم ان چھوٹی چھوٹی چیزوں کا بھی خیال رکھتے ہیں۔
انہوں نے کہا کہ ہماری چھوٹی چھوٹی کاوشوں کی تعریف کرتے ہوئے، انہوں نے یہ خط ہمیں بھیجا ہے جس کے لیے ہم اور ہماری تنظیم زندگی بھر ان کا مقروض رہے گی۔
ابھے شنکر تیواری نے کہا کہ یہ خط موصول ہونے کے بعد ہماری تنظیم کے لوگوں میں ایک نئی توانائی پھیل گئی ہے۔ نئی توانائی سے لوگوں کی خدمت جاری رکھیں گے۔
انہوں نے کہا کہ ہماری کوشش ہوگی کہ ہم ضرورت مند لوگوں تک پہنچیں اور ان کی خدمت جاری رکھیں۔
