پی ایف آئی کے دہلی یونٹ کے سربراہ پرویز احمد نے دہلی میں پریس کانفرنس کے دوران کہا کہ اترپردیش کی شاملی علاقے میں پوسٹر چسپاں کرنے پر پی ایف آئی کے کچھ حامیوں کو حراست میں بھی لیا گیا، جبکہ دہلی پولیس بھی پی ایف آئی کے ذمہ داروں کو ہراساں کر رہی ہے۔
پرویز احمد نے بتایا کہ پی ایف آئی نے ہجومی تشدد کے خلاف بیداری پھیلانے اور اس کی وجہ سے پیدا ہوئے عدم تحفظ کے احساس کو ختم کرنے کے لیے گھر گھر پوسٹر چپکانے کی مہم شروع کی ہے جس میں ایک خاکہ کے ذریعے قاتل بھیڑ کا دفاع کرنے اور بے خوف جینے کا پیغام ہے۔
پرویز احمد نے بتایا کہ جب سے یہ پوسٹر آویزاں کیا جارہا ہے تب سے دہلی پولیس کے اہلکار پی ایف آئی کے ذمہ داروں اور حامیوں کو یہ کہہ کر پریشان کر رہی ہے کہ پوسٹر اکثریتی سماج کے خلاف ہے۔
انہوں نے ایک سوال کے جواب میں کہا کہ یہ مہم بیداری کی ایک مہم ہے، اس میں ڈر اور خوف ختم کرنے کا پیغام ہے، جسے کرنے سے ہم نہیں رکیں گے ۔
