دہلی میں بارش کے ابھی کوئی آثار نہیں

دارالحکومت دہلی میں بارش نہیں ہونے کے سبب لوگوں کو شدید گرمی کا سامنا کرنا پڑرہا ہے۔ حالانکہ گزشتہ روز جزوی طورپر آسمان میں بادل چھائے رہے۔

نئی دہلی: راجدھانی دہلی میں بارش کے کوئی آثار نظر نہیں آرہے ہیں۔ گزشتہ دو دن پہلے ہوئی بارش سے ملی راحت کے بعد لوگوں کو پھر سے گرمی کا سامنا کرنا پڑرہا ہے۔

محکمہ موسمیات کے مطابق دہلی سمیت مغربی اترپردیش کے باقی حصوں اور ہریانہ، پنجاب، راجستھان کے کچھ حصوں میں 10 جولائی کے آس پاس مانسون کے آگے بڑھنے کے لئے حالات کا موافق رہنے کا اندازہ ہے۔

راجدھانی میں پیر کو جزوی طورپر بادل چھائے رہے جب کہ زیادہ سے زیادہ درجہ حرارت 42 ڈگری سیلسیس اور کم از کم 29 ڈگری سیلسیس درج کیا گیا پھر بھی ریاست کے باشندوں کو چلچلاتی گرمی کا سامنا کرنا پڑرہا ہے۔ یہاں دن میں 11 کلومیٹر کی رفتار سے ہوائیں چل رہی ہیں اور ہوا میں نمی کی سطح 41 فیصد ریکارڈ کی گئی۔