کانگریس کے میڈیا انچارج رندیپ سنگھ سرجیولا نے پارٹی دفتر میں صحافیوں سے کہا کہ بی جے پی کو نہ مہنگائی کی پروا ہے اور نہ ہی عوام کی کوئی فکر ہے۔
انہوں نے خوردہ مہنگائی کے اعداد و شمار کا ذکر کرتے ہوئے کہا کہ نومبر 2013 کے مقابلے میں خوردنی اشیاء کی مہنگائی عروج پر ہے۔ انہوں نے کہا ’’ہماری مانگ ہے کہ وزیراعظم فوراَ حزب اختلاف کی میٹنگ بلائیں۔ پورے ملک کو اعتماد میں لے کر آئندہ 15 -30 دن میں مہنگائی کم کرنے کا روڈمیپ بتائیں۔
رندیپ سنگھ نے کہا کہ مودی جی چپ رہے کر ملک کے عوام کو مہنگائی، بے روز گاری اور تقسیم کی آگ میں جھونک کر اپنی ذمہ داروں سے بھاگ نہیں سکتے۔ انہوں نے کہا کہ سبزیوں کی قیمتیں 60 فیصد، دالوں کی 15.5 فیصد اور مسالوں کی چھ فیصد بڑھی ہیں۔ انہوں نے کہا ’’ اب سبزی خور ہونا بھی گناہ ہو گیا‘‘۔ بعد میں انہوں نے ایک ٹویٹ میں وزیراعظم نریندر مودی کے وعدوں کا ذکر کرتے ہوئے کہا ’’ دیں گے ہر سال دو کروڑ روزگار اور کریں گے مہنگائی پر وار کھا گئی ڈائن مہنگائی، خوردہ مہنگائی آٹھ فیصد تک پہنچائی۔ مودی جی ہیں کہ نہ سنتے، نہ بولتے، نہ حل ڈھوڈھتے ہیں‘‘۔
اس دوران پارٹی کی جنرل سیکریٹری پرینکا گاندھی واڈرا نے کہا کہ بھارتیہ جنتا پارٹی حکومت غریب کے پیٹ پر لات مار رہی ہے۔ انهوں نے کہا ’’سبزیاں، خوردنی اشیاء عام لوگوں کی پہنچ سے باہر ہو رہی ہیں۔ جب سبزی، تیل، دال اور آٹا مہنگا ہوجائے گا تو غریب کھائے گا کیا؟ اوپر سے کساد بازاری کی وجہ سے غریب کو کام بھی نہیں مل رہا ہے۔ بی جے پی حکومت نے تو جیب کاٹ کر پیٹ پر لات مار دی ہے۔
