نئی دہلی: نبی کریمﷺ کی شان میں گستاخی کرنے والی حکمراں جماعت کی رہنما نوپور شرما اور نوین جندل کے بارے میں ایم آئی ایم دہلی کے صدر نے کلیم الحفیظ نے میڈیا کے نام جاری بیان میں کہا کہ پارٹی سے معطل کرنا صرف کافی نہیں ہے۔ انہیں گرفتار کرتے ہوئے ان کے خلاف سخت سے سخت کاروائی کی جائے۔
کلیم الحفیظ نے نپور شرما اور نوین کمار جندل کے خلاف بی جے پی کی کارروائی کو ناکافی بتاتے ہوئے کہا کہ ان کا جرم بڑا ہے۔ انہیں گرفتار کیا جانا چاہیے اور مزید سخت کارروائی ہونی چاہیے۔ انہوں نے کہا کہ کانپور کا تشدد ہو یا یو اے ای، سعودی عرب، قطر، ایران سمیت دنیا کے 52 ملکوں میں ہندوستان کی مخالفت ہو اس کے لیے بی جے پی کی قومی ترجمان نپور شرما اور دہلی بی جے پی کے میڈیا انچارج نوین کمار جندل ذمہ دار ہیں AIMIM Demands Arrest of Nupur Sharma under UAPA۔
انہوں نے کہا کہ ان کی حرکتوں سے بیرون ملک میں ہندوستان کی بدنامی ہو رہی ہے۔ ہمارا اقتصادی نقصان بھی ہوا ہے اور رشتوں میں بھی خرابی پیدا ہوئی ہے۔ ہمارے سفارت کاروں کو قطر سے لیکر ایران تک طلب کیا گیا۔ شاپنگ مال سے ہمارے سامان پھینکے گئے اور کروڑوں ہندوستانیوں پر گھر واپسی کی تلوار لٹک گئی ہے۔ اس کے لیے ذمہ دار کون ہے؟ ان دونوں لیڈران کے بیانات ملک کے ساتھ غداری ہے۔ ایسے لیڈران کے خلاف یو اے پی اے کے تحت کاروائی کی جائے اور انھیں جیل بھیجا جائے۔
کلیم الحفیظ نے کہا کہ اگر نوپور شرما اور نوین جندل کو گرفتاری نہیں کیا گیا تو ایم آئی ایم جنتر منتر پر احتجاجی مظاہرے کرے گی اور دھرنا بھی دے گی۔ انہوں نے مزید کہا کہ مجلس کے قومی صدر بیریسٹر اسد الدین اویسی اور کل ہند مجلس اتحاد المسلمین کی جانب سے ہی رسول اللہﷺ کی شان میں گستاخی کرنے والوں کے خلاف آواز بلند کی گئی، تھانوں میں شکایت درج کرائی گئی جب کہ نام نہاد اپوزیشن اور سیکولر پارٹیاں خاموش تماشائی بنی رہیں۔
مزید پڑھیں:
کلیم الحفیظ نے کہا کہ سماجوادی پارٹی کے چیف اکھلیش یادو نے کانپور معاملہ میں اپنے مسلم کارکنان کا نام آتے ہی ان کا ساتھ چھوڑ دیا جب کہ انھیں معلوم کرنا چاہیے تھا کہ سچائی کیا ہے؟ دہلی مجلس کے صدر نے الزام عائد کرتے ہوئے کہا کہ جب بھی مسلم لیڈران کو غلط پھنسایا جاتا ہے تو نام نہاد سیکولر پارٹیاں انھیں دودھ میں پڑی مکھی کی طرح نکال کر پھینک دیتی ہیں، یہ ان کی اصلیت ہے۔ میں اس حرکت کی شدید مذمت کرتا ہوں۔
