ایک طرف کرونا کی وبا تیزی سے پھیل رہی ہے وہیں دوسری طرف تہوار بھی اس مہلک بیماری کی نذر ہو رہے ہیں ایسے میں عید الفطر کی نماز گھروں میں ہی ادا کی گئی تھی لیکن اب عید الاضحی سر پر ہے ایسے میں عید قرباں کو کس طرح سے منائیں اس سے متعلق ای ٹی وی بھارت متعدد مفتیان سے گفتگو کرکے اپنے قارئین تک پہنچا رہی ہے۔
ای ٹی وی بھارت کے نمائندے نے جعفرآباد میں امامت کر رہے مفتی محمد طالب ندوی سے عید الاضحی پر کی جانے والی قربانی کی فضیلت پر بات کی جس میں انہوں نے بتایا کہ ان دنوں میں اللہ کے نزدیک سب سے پسندیدہ عمل اپنے جانور کا خون بہانا ہے۔
انہوں نے مزید کہا کہ عید الاضحی کے ایام میں اللہ کے نزدیک قربانی کا عمل جہاد سے بھی زیادہ افضل ہے۔ موجودہ دور میں کورونا وائرس پھیل رہا ہے لیکن اس کا عید الاضحی سے کوئی تعلق نہیں ہے جس طرح سے گذشتہ برسوں میں عید قرباں منائی جاتی رہی ہے ویسے ہی منانی ہے۔
لیکن صفائی بھی ہمارے ایمان کا حصہ ہے اور نبی کریم نے بھی صفائی کو آدھا ایمان بتایا ہے اس لیے ہمیں چاہیے کہ ہم قربانی کرنے کے دوران کسی بھی طرح کی گندگی نہ پھیلائیں۔
