بیرون ملک سے واپس لوٹنے والے مزدوروں اور ملک سے اپنے آبائی ریاست کو لوٹ چکے مزدوروں کو ان کے گھر کے نزدیک ہی نوکری دینے کے منصوبہ پر حکومت کام کررہی ہے۔
اسکل ڈیولپمنٹ اور کاروبارکے فروغ کے وزیر مہندرناتھ پانڈے نے کہا ہے کہ 'وزیراعظم نریندر مودی کی قیادت میں پورے ملک میں کورونا وائرس کے انفیکشن کی روک تھام کے لئے حکومت ہرممکن کوشش کررہی ہے۔'
پانڈے نے کہا کہ 'کووڈ۔19 کے خلاف لڑائی میں حکومت اپنا کردار ادا کررہی ہے۔ اسکل انڈیا سے جڑی یونٹوں کے تعاون اوران کے منصوبوں کے ڈیولپمنٹ کے کاموں اور اس عالمی وبا کے بعد کے منصوبوں کے سلسلے میں جائزہ میٹنگ منگل کو ہوئی۔'
اس دوران انہوں نے وزارت کے سینئر افسران کے ساتھ کووڈ۔19 کی روک تھام اور بحران کے دوران ملک کے غیر مقیم مزدوروں سمیت وندے بھارت مشن کے تحت بیرون ممالک سے آرہے ملازموں کے لئے شروع کئے جارہے منصوبوں اور مختلف پہلوؤں پر بات چیت کی۔
پانڈے نے کہا کہ 'ہم اپنے اسکل انڈیا مشن کی وجہ سے پورے ملک میں معاشی سرگرمیوں کو چلانے کے لئے ہنرمند افرادی قوت مہیا کرانے کی سمت میں پورے عزم اور پوری ایمانداری سے کام کررہے ہیں۔ کیونکہ ملک اس وقت کورونا کے مشکل دور سے گذررہا ہے اس لئے اس چیلنج بھرے وقت میں ہم سبھی کو صبر اور تحمل کے ساتھ آگے آکر ایک دوسرے کی حمایت کرنے کی ضرورت ہے۔'
