دہلی کے نائب وزیراعلیٰ منیش سسودیا نے کورونا کے پھیلاؤں میں شدت پر تشویش کا اظہار کرتے ہوئے کہا کہ ریاست میں 31 جولائی تک کورونا متاثرین کی کل تعداد 5.5 لاکھ تک پہنچ سکتی ہے۔ انہوں نے پیشین گوئی کرتے ہوئے کہا کہ آنے والے وقت میں ہسپتالوں میں بستروں کی کمی ہوگی۔
منیش سسودیا نے لفٹننٹ گورنر انیل بائجل اور دیگر اعلیٰ عہدیداروں سے ملاقات کے بعد کہا کہ دہلی میں 12 تا 13 دنوں میں کورونا کیسز دوگنا ہو رہے ہیں اور اگر آگے بھی اسی طرح کے حالات رہنے پر 31 جولائی تک کورونا متاثرین کی تعداد ساڑھے پانچ لاکھ ہوجائے گی جبکہ اس وقت ہسپتالوں میں 80 ہزار بستروں کی ضرورت ہوگی۔
دہلی حکومت نے 15 جون تک 44 ہزار کیسز، 30 جون تک ایک لاکھ کیسز اور 15 جولائی تک دیڑھ لاکھ کورونا کیسز ہونے کا خدشہ ظاہر کیا۔
دہلی میں کنٹینمنٹ زونس اور ہاٹ اسپاٹ میں بے تحاشہ اضافہ ہو رہا ہے۔ ریاستی حکومت کے اعلیٰ عہدیداروں کے مطابق لاک ڈاون کے دوران سخت تحدیدات کا نفاذ تھا لیکن لاک ڈاون میں نرمی کے بعد سماجی فاصلہ کے معاملے میں بڑے پیمانہ پر خلاف ورزیوں کی وجہ سے کورونا کیسز میں تیزی سے اضافہ دیکھا جارہا ہے۔
مہلک وائرس کے پھیلاؤ کو روکنے میں ناکامی پر عام آدمی پارٹی حکومت کو تنقید کا نشانہ بنایا جارہا ہے۔ اسی دوران وزارت داخلہ کے ذرائع نے بتایا کہ معیشت کو پٹری پر واپس لانے کے مقصد کے تحت لاک ڈاون میں نرمی دی گئی ہے لیکن اگر کیسز میں بے تحاشہ اضافہ درج کیا جاتا ہے تو دہلی میں دوبارہ پابندیاں عائد کی جاسکتی ہیں۔
