نئی دہلی: کانگریس کے صدر ملکارجن کھرگے 4 جنوری کو پارٹی کی 2024 لوک سبھا انتخابی منشور کمیٹی کی پہلی میٹنگ کی صدارت کریں گے۔ جس میں بڑی حد تک پارٹی کے سماجی بہبود اور اقتصادی ایجنڈے پر توجہ مرکوز کرنے کی امید ہے۔ پینل کی پہلی میٹنگ 4 جنوری کو ہوگی۔ کانگریس کی منشور کمیٹی کے کنوینر ٹی ایس سنگھ دیو نے ای ٹی وی بھارت کو بتایا کہ پارٹی کی وسیع تر توجہ سماجی بہبود، معیشت اور سلامتی کو فروغ دینے پر ہوگی۔ سماجی بہبود ایک وسیع دائرہ ہے اور اس میں ملازمتیں، سماجی ہم آہنگی، مہنگائی میں اضافہ اور خواتین کی سلامتی جیسے مسائل شامل ہیں۔ پارٹی کی دستاویز میں دیگر مسائل کے علاوہ اندرونی سلامتی، چینی سرحدی دراندازی پر بھی توجہ دی جائے گی۔
کانگریس کے رہنما سنگھ دیو نے کہا،پارٹی کے منشور میں دو مسائل کا خاص ذکر ہوگا، ذات پات کی مردم شماری اور لوک سبھا اور ریاستی اسمبلیوں میں خواتین کے لیے 33 فیصد ریزرویشن جو بالترتیب پارٹی کی سابق سربراہان سونیا گاندھی اور راہول گاندھی کے دل کے قریب ہیں۔ذات کی مردم شماری ہمارے لیے سیاسی آلہ نہیں ہے۔ اس کا مقصد معاشرے کی معروضی سماجی تقسیم فراہم کرنا ہے اور اسے قومی وسائل کی منصفانہ تقسیم کے لیے استعمال کیا جائے گا۔ جہاں تک خواتین کے ریزرویشن کے معاملے کا تعلق ہے، مودی حکومت نے ایک قانون بنا کر ملک کے خواتین ووٹروں کو دھوکہ دیا ہے، جو کہ 2029 سے پہلے لاگو نہیں ہوگا۔
کانگریس کے منشور پینل کی سربراہی سابق وزیر خزانہ پی چدمبرم کر رہے ہیں اور اس میں پرینکا گاندھی واڈرا بطور رکن شامل ہیں۔ اس کے مطابق، دستاویز معیشت کو مضبوط بنانے اور خواتین کو بااختیار بنانے پر زور دے گی۔سنگھ دیو نے کہا "معیشت تمام گڈ گورننس اور سماجی بہبود کی پالیسیوں کی بنیاد ہے۔ ہم زمینی سطح کے حالات کو مدنظر رکھتے ہوئے ایک نیا مسودہ تیار کرنے کے لیے ماضی کے منشور کو دیکھیں گے۔ پارٹی کا منشور نہ صرف 2024 بلکہ اس کے بعد بھی توجہ مرکوز کرے گا،‘‘
پارٹی کے اندرونی ذرائع کے مطابق، کانگریس اپنا منشور رکھے گی اور اس دستاویز کو لوگوں تک لے جائے گی، انڈیا اتحادیوں کے ساتھ مل کر ایک الگ مشترکہ کم از کم پروگرام تیار کیا جائے گا۔ سنگھ دیو نے کہا "اس سے پہلے، ہم اپنے منشور کے ساتھ انتخابات میں گئے تھے جبکہ اتحادیوں کے وعدے تھے۔ یہ اتحاد کوئی سیاسی پارٹی نہیں ہے، بلکہ صرف ایک پری پول الائنس ہے، جس میں سیٹ شیئرنگ ہوگی،"
اگرچہ کانگریس نے 2019 کے لوک سبھا انتخابات کے منشور کے لیے لوگوں کی آراء جاننے کے لیے ایک وسیع مشق کا انعقاد کیا تھا، لیکن اس بار پارٹی کو ایک سخت شیڈول پر کام کرنا ہے۔ ریاستوں کی ایک بڑی تعداد کا احاطہ کرنا ہے، لیکن عوامی مشاورت کے لیے کسی نہ کسی طریقہ کار کو تیار کیا جائے گا۔سنگھ دیو نے کہا ہوسکتا ہے کہ ہم پارٹی کے منشور سے ان کی توقع کے بارے میں آن لائن عوامی آراء حاصل کر سکیں یا ملک کو الگ الگ جغرافیائی علاقوں میں تقسیم کر سکیں جہاں عوامی مشاورت کسی مرکزی مقام پر ہو سکے۔ ابھی کچھ بھی حتمی نہیں ہے۔ جب ہم ملیں گے، تمام انتظامی مسائل کو حل کر لیا جائے گا،‘‘
