دارالحکومت دہلی میں واقع جامعہ ملیہ اسلامیہ یونیورسٹی نے وزیر اعظم نریندر مودی پر تبصرہ کرنے والے ایک طالب علم کو شوکاز نوٹس جاری کیا ہے۔ واضح رہے کہ جامعہ کے چیف پراکٹر پروفیسر وسیم اے خان کا کہنا ہے کہ 'ان طلباء نے سوشل میڈیا پر جامعہ کے نام پر وزیر اعظم نریندر مودی پر غیر مہذب تبصرہ کی تھی۔ ایسی صورتحال میں طالب علم کو یونیورسٹی کا شبیہہ اور یونیورسٹی کے قواعد کی خلاف ورزی کا حوالہ دیتے ہوئے شوکاز نوٹس جاری کیا گیا ہے۔ جس کے تحت انہیں ایک ہفتہ میں اپنی صفائی دینی ہوگی۔ ایسا نا کرنے پر طلبا پر کارروائی کی جا سکتی ہے۔
جامعہ کے چیف پراکٹر پروفیسر وسیم اے خان نے کہا کہ 'یہ تبصرہ جامعہ کے وائس چانسلر سمیت متعدد عہدیداروں کو انسٹاگرام کے جامعہ ٹائمز 1 کے پیج پر ٹیگ کرکے کیا گیا ہے۔ اس کی وجہ سے جامعہ یونیورسٹی کی شبیہہ عوام میں داغدار ہوگئی ہے۔ جسے برداشت نہیں کیا جائے گا۔ پروفیسر وسیم نے بتایا کہ 'انسٹاگرام کے اس پیج سے جامعہ کا کوئی لینا دینا نہیں ہے۔
وہیں طالب علم کو ایک ہفتہ کے اندر یہ بتانا پڑے گا کہ ان کے خلاف کارروائی کیوں نہیں کی جانی چاہئے۔ اگر طلباء دیئے گئے وقت کے اندر جواب نہیں دیتے ہیں تو یونیورسٹی قوانین کے تحت ان کے خلاف تادیبی کارروائی کی جائے گی۔
