قومی دارالحکومت دہلی کے اپنے دورہ کے موقع پر آندھرا پردیش (اے پی) کے وزیراعلی وائی ایس جگن موہن ریڈی نے آج دوبارہ مرکزی وزیرداخلہ امت شاہ اور گجیندر سنگھ شیخاوت سے ملاقات کی ہے۔
واضح رہے کہ کل شب بھی امت شاہ سے ان کی ملاقات ہوئی تھی تاہم آج صبح انہوں نے ایک مرتبہ پھر ان سے ملاقات کی۔
منگل کی شب ہوئی امت شاہ سے ملاقات کے موقع پر انہوں نے اے پی تنظیم نو قانون کے مطابق اس تلگو ریاست کے لیے مرکز کی امداد پر بھی بات چیت کی۔
انہوں نے دیشا ایکٹ، قانون ساز کونسل کو منسوخ کرنے اور پارلیمنٹ میں دو بلز کی منظوری پر بھی زور دیا، اور اے پی کی ترقی اور ریاست کی تازہ سیاسی صورتحال پر بھی دونوں رہنماؤں نے گفتگو کی۔
قبل ازیں جگن موہن نے مرکزی وزیر جل شکتی گجیندر سنگھ شیخاوت سے بھی ملاقات کرتے ہوئے مختلف امور پر تقریباً 20 منٹ تک بات چیت کی۔
ایسا خیال کیا جارہا ہے کہ اس ملاقات میں آبپاشی کے پانی کے ساتھ ساتھ پولاورم پروجیکٹ کو مرکزی فنڈز کی فراہمی، ریاست کے بعض دیگر پروجیکٹز کو مرکزی امداد پر بھی تبادلہ خیال کیا گیا۔
واضح رہے کہ جگن موہن ریڈی نے پولاورم پروجیکٹ کی دسمبر سنہ 2021 تک تکمیل کے لیے امید ظاہر کی ہے۔
جگن موہن ریڈی کے ساتھ وائی ایس آر کانگریس پارٹی کے ارکان پارلیمنٹ وجے سائی ریڈی، متھن ریڈی اور دوسرے رہنما بھی موجود تھے۔
