نئی دہلی: جمعیت علمائے ہند کے صدر مولانا محمود اسعد مدنی نے اقلیتوں پر زیادتیوں کے سلسلے میں آر ایس ایس کے رہنما رام مادھو کے بیان کو حقیقت سے آنکھ چرانے کے مترادف قرار دیا ہے۔ رام مادھو نے انڈونیشیا کے آر 20 پروگرام میں مذہبی رہنماؤں سے خطاب کرتے ہوئے یہ کہا کہ ہندوستان میں مذہبی اقلیتوں کو ظلم و ستم کا نشانہ بنانے کا دعویٰ غلط ہے۔ انہوں نے مزید کہا کہ ہندوستان نے اپنی سرزمین پر ہمیشہ مظلوموں کا استقبال کیا ہے۔ مولانا مدنی نے اپنے بیان میں کہا کہ بین الاقوامی سطح پر ہندوستان کی شناخت قابل فخر رہی ہے بالخصوص کثرت میں وحدت اور مظلوموں کی حمایت قابل فخر سرمایہ اور عظیم ورثہ ہے لیکن یہ ہماری بدقسمتی ہے کہ گزشتہ چند برسوں میں اس کو نقصان پہنچانے والی طاقتوں کا اثر بڑھا ہے۔ It is not loyalty to deny that Minorities have been oppressed in India Mahmood Madani
یہ بھی پڑھیں:
یہ طاقتیں چند برسراقتدار عناصر کے توسط سے اقلیتوں بالخصوص مسلمانوں کو نشانہ بنا رہی ہیں جن پر ناقابل انکار شواہد موجود ہیں اس سلسلے میں ٹائم میگزین کی رپورٹ 2021، این ڈی ٹی وی کی رپورٹ 2018 ، پینل آف انڈیپینڈینٹ انٹرنیشنل ایکسپرٹ جون 2022، ایمنسٹی انٹرنیشنل رپورٹ 2022، دیگر قومی و بین الاقوامی رپورٹس شاہد عدل ہیں۔ مولانا مدنی نے کہا کہ یہ ممکن ہے کہ چند رپورٹس مبالغہ پر مبنی ہوں لیکن من جملہ یہ حقیقت واضح ہے کہ اقلیتوں پر جسمانی و زبانی حملے ہوئے ہیں ان کے خلاف نفرت پر مبنی بیانات کا سلسلہ بڑھا ہے اور اس سلسلے میں قانون نافذ کرنے والی ایجنسیاں اپنی کارروائی کرنے میں ناکام ہیں خود ملک کی سب سے بڑی عدالت سپریم کورٹ نے نفرتی بیان بازی پر گہری تشویش ظاہر کی ہے۔
مولانا مدنی نے کہا کہ ہمیں حقائق پر پردہ پوشی کی چنداں ضرورت نہیں مظالم کے سلسلے میں حقائق کی تردید اس وطن عزیز کے ساتھ وفاداری نہیں ہے بلکہ ظلم سے روکنا اور مظلوموں کی مدد وطن کی اصل خدمت ہے۔ ہم ایک مضبوط جمہوریت اور نظام عدل رکھتے ہیں ہمیں سچائی کا سامنا کرتے ہوئے کارروائی کرنی چاہیے تاکہ ملک دشمن عناصر کو ہمارے بارے میں غلط فہمیاں پھیلانے کا موقع نہ ملے اور ہماری عظمت و ناموری پر خاک ڈالنے والے ناکام ہوجائیں۔
