ملک بھر میں کورونا وارئیرز کی حوصلہ افزائی کے لیے مختلف طریقے اپنائے جا رہے ہیں تاہم آج دارالحکومت دہلی کے مختلف اسپتالوں میں اپنی خدمات انجام دے رہے ڈاکٹرز اور دیگر اسٹاف کے لیے انڈین ایئر فورس کی جانب سے ان کی حوصلہ افزائی کی گئی۔
آج دہلی کی لوک نائک جے پرکاش ایمس اور تاہر پور میں واقع راجیو گاندھی ہسپتال کے اوپر پھولوں کی بارش کی گئی۔ اس کا مقصد کورونا جیسی مہلک وبا کے درمیان اپنی جان خطرے میں ڈال کر عوام کی خدمت کرنے والے ڈاکٹرز اور دیگر اسٹاف کی حوصلہ افزائی کرنا تھا۔
قابل ذکر ہے کہ اس سے پہلے بھی بھارتی وزیراعظم نریندر مودی نے بھارتی عوام سے اپیل کی تھی کہ وہ شام کے 5 بجے بالکنی میں آ کے تالیاں بجا کر کورونا وارئیرز کی حوصلہ افزائی کریں۔
جبکہ دوسری بار وزیراعظم نریندر مودی کی جانب سے یہ اعلان کیا گیا تھا کہ رات میں 9 بجے موم بتی یا ٹارچ جلا کر کرونا وارئیرز کی خدمات کو سراہیں۔
