سینیئر رہنما نٹور سنگھ نے کہا کہ پنجاب کے سابق وزیراعلیٰ کیپٹن امریندر سنگھ کسان اور مرکزی حکومت کے درمیان بات چیت کا ذریعہ بننے کے لیے موزوں ترین شخص ہیں اور انہیں پہل کرنی چاہیے۔
یو این آئی کے ساتھ خصوصی گفتگو میں نٹور سنگھ نے کہا کہ اتر پردیش حکومت نے لکھیم پور کھیری واقعہ پر 'مِس ہینڈلنگ' کی اور کانگریس کی جنرل سکریٹری پرینکا گاندھی وڈرا کی گرفتاری نے اسے قومی مسئلہ بنا دیا جس کے لیے بھارتیہ جنتا پارٹی کو خمیازہ بھگتنا پڑسکتا ہے۔
اس سوال پر کہ کسانوں کی تحریک کو 10 ماہ سے زیادہ ہو چکے ہیں اس کا ذمہ دار کون ہے اور اب اسے کیسے حل کیا جا سکتا ہے؟ تو انہوں نے کہا کہ مجھے لگتا ہے دونوں کسی حد تک صحیح اور غلط ہیں۔
نٹور سنگھ نے کہا کہ 'مجھے نہیں لگتا کہ کسان اتنے عرصے تک اسے کھینچ سکیں گے لیکن اب یہ ان دونوں کے لیے وقار کا معاملہ بن گیا ہے شاید اسی لیے کوئی پیچھے نہیں ہٹنا چاہتا۔ اس تنازع کو ختم کرنے کے لیے وزیر اعظم اور کسانوں کے درمیان بات چیت کی ضرورت ہے۔
یو این آئی رپورٹ
