قومی دارالحکومت دہلی سے متصل شہر نوئیڈا میں خواتین کے تحفظ کے حوالے سے اترپردیش حکومت ظاہری طور پر کافی سنجیدہ نظر آرہی ہے، اس کو عملی جامہ پہنانے کے لیے 'مشن شکتی مہم' کا آغاز کیا اور نوئیڈا کے کمشنر آفس سے بیداری وین کو گرین سگنل دکھا کر روانہ کیا گیا۔
اتنا ہی نہیں اسی ضمن میں 50 سدھا سکوٹیز کو بھی گرین سگنل دکھایا گیا، جس کو خواتین پولیس اہلکار استعمال کریں گی۔
اس موقع پر پولیس کمشنر آلوک سنگھ، اترپردیش خواتین کمیشن کی صدر وملا باتھم اور اترپردیش ویمن کمیشن کی نائب صدر سشما سنگھ اور ضلع کی خواتین نمائندہ اس پروگرام میں موجود تھیں۔
بیداری وین شہر میں خواتین کو بااختیار بنانے کے حوالے سے بیدار کرے گی، جبکہ سکوٹی پر سوار خواتین پولیس اہلکار بھیڑ بھاڑ والے علاقوں میں نگرانی کا کام کریں گی۔
اس مہم کے تحت ایک مختصر فلم ایل ای ڈی سکرین کے ذریعے نشر کی جائے گی جس میں سادہ زبان میں خواتین کو اپنے ساتھ ہونے والے جرائم سے آگاہ کرے گی اور کسی بھی مظالم یا ہراساں ہونے کی صورت میں پولیس کی خدمات حاصل کرنے کا طریقہ بتائے گی۔
یہ گاڑی گاؤں، بستیوں، سوسائٹیز، راملیلا اور عبادت گاہوں، بازار وغیرہ کے آس پاس رک کر لوگوں کو اس طرف راغب کرکے اپنا پیغام دے گی۔
خواتین پولیس اہلکار اس گاڑی کے ساتھ مستقل رہیں گی اور پولیس کی خدمات کے بارے میں آگاہ کریں گی۔
یہ گاڑی 25 اکتوبر تک گاڑی مسلسل دورے پر رہی گی، اس گاڑی میں ویڈیو کانفرنسنگ کی سہولت بھی موجود ہے، جس کا استعمال کرتے ہوئے ڈپٹی کمشنر پولیس ویمن سیفٹی اور اے سی پی کچھ دیہی اور شہری مقامات پر جمع لوگوں کے ساتھ ورچوئل وومن چوپال منعقد کریں گی۔
