مرکزی حکومت نے پارلیمنٹ کے آئندہ مانسون سیشن (parliament monsoon session) سے متعلق امور پر تبادلہ خیال کے لئے ایک کُل جماعتی اجلاس طلب کیا ہے۔
ذرائع کا کہنا ہے کہ 'پارلیمنٹ کمپلیکس میں صبح 11 بجے سے اجلاس کا آغاز ہونے کا امکان ہے، اجلاس میں وزیر اعظم نریندر مودی بھی شرکت کر سکتے ہیں۔'
ذرائع نے بتایا کہ پارلیمانی امور کے وزیر پرہلاد جوشی اجلاس کے دوران ایوان کے قائدین سے بات چیت کریں گے اور 19 جولائی کو اجلاس شروع ہونے سے پہلے ان کے خیالات لیں گے۔
وہیں لوک سبھا اسپیکر اوم برلا شام 4 بجے ایوان زیریں کے فلور رہنماؤں کے ساتھ میٹنگ کریں گے۔
یہ اجلاس مانسون سیشن سے ایک دن پہلے طلب کیا گیا ہے یہ سیشن 19 جولائی سے 13 اگست تک جاری رہے گا۔ موجودہ کووڈ 19 وبائی امراض کی دوسری لہر کے بعد یہ پہلا سیشن ہوگا۔ سیشن کا وقت صبح 11 بجے سے شام 6 بجے تک رہے گا۔
یہ بھی پڑھیں: مانسون سیشن: اپوزیشن کووڈ، مہنگائی، تیل پرحکومت کو گھیرے گی
بتایا جارہا ہے کہ شام کے تین بجے این ڈی اے کے اتحادیوں کی ایک میٹنگ بھی ہوگی جس میں مانسون سیشن کی حکمت عملی پر تبادلہ خیال کیا جاسکتا ہے۔ یہ اجلاس پی ایم مودی کی زیرصدارت ہوگا۔
