گمبھیر نے ارون جیٹلی اسٹیڈیم میں خود گوتم گمبھیر اسٹینڈ کا افتتاح کیا۔انہوں نے گوتم گمبھیر اسٹینڈ کا افتتاح کرنے کے بعد پریس کانفرنس میں کہا کہ میرے لیے یہ بڑے فخر اور اعزاز کی بات ہے کہ میرے نام پر اس اسٹیڈیم میں ایک اسٹینڈ کا نام رکھا گیا ہے۔میں نے اپنی تمام کرکٹ اس میدان پر کھیلی ہے، یہیں سے میں نے کرکٹ سیکھی ہے اور مجھے بڑا اعزاز محسوس ہو رہا ہے کہ اس اسٹیڈیم میں اب گوتم گمبھیر اسٹینڈ بھی رہے گا۔
قابل ذکر ہے کہ کچھ وقت پہلے دار الحکومت کے فیروز شاہ اسٹیڈیم کا نام آنجہانی مرکزی وزیر اور دہلی اینڈ ڈسٹرکٹ کرکٹ ایسوسی ایشن (ڈي ڈي سي اے) کے سابق صدر ارون جیٹلی کے نام پر رکھا گیا تھا۔
یہ اسٹیڈیم اب ارون جیٹلی اسٹیڈیم کہلاتا ہے۔اگرچہ اس کا میدان فیروز شاہ کوٹلہ میدان ہی ہے۔
اپنے نام پر اسٹینڈمنسوب کئے جانے کے بعد گمبھیر سابق بھارتی کپتان بشن سنگھ بیدی اور 1983 کی ورلڈ کپ فاتح ٹیم کے رکن مہندر امرناتھ کی مخصوص صف میں شامل ہو گئے ہیں جن کے نام پر ارون جیٹلی اسٹیڈیم میں دو اسٹینڈ کے نام ہیں۔
موجودہ بھارتی کپتان وراٹ کوہلی کے نام پر اس اسٹیڈیم میں ایک پویلین ہے جبکہ دھماکہ خیز اوپنر وریندر سہواگ اور سابق خاتون کرکٹر انجم چوپڑا کے نام پر دو گیٹ ہیں۔
