نئی دہلی: اڈانی وِلمار گروپ کے ڈپٹی چیف ایگزیکٹو آفیسر انگشو ملک نے آج بتایا کہ 'ٹیم انڈیا کے سابق کپتان اور بھارت میں بھارتیہ کرکٹ کنٹرول بورڈ (بی سی سی آئی) کے چیئرمین سوروگنگولی کمپنی کے برانڈ ایمبیسڈر برقرار رہیں گے۔
گنگولی اڈانی گروپ کے خوردنی تیل کی تشہیر کرتے ہیں۔ لیکن ہفتہ کو ان کی طبیعت خراب ہونے کی خبر کے بعد ٹی وی پر ان کا اشتہار نہیں دکھایا جارہا تھا۔
واضح رہے کہ انہیں دل کا ہلکا دورہ پڑا ہے۔ اس کے بعد گنگولی کو کولکتہ کے ووڈ لینڈز ہسپتال میں داخل کرایا گیا جہاں سے انہیں بدھ کو ڈسچارج کیا جائے گا۔
ملک نے بتایا کہ "رائس بران آئل دنیا کا سب سے صحت مند تیل ہے اور یہ خراب کولیسٹرول کو کم کرتا ہے اور لپڈ پروفائل کو بہتر کرتا ہے۔ گنگولی ہمارے برانڈ ایمبیسڈر ہیں اور رائس بران تیل کا اشتہار دیتے ہیں۔ یہ تیل کوئی دوا نہیں بلکہ کھانا پکانے کا تیل ہے۔‘‘
