اتر پردیش کے نوئیڈا اتھارٹی کے خلاف کسانوں کا احتجاج دن بدن بڑھتا جا رہا ہے۔ جمعرات کے روز کسانوں نے نوئیڈا کے سیکٹر 5 میں واقع ہرولا بارات گھر میں منعقدہ پنچایت میں اتھارٹی کے رویہ پر ناراضگی کا اظہار کیا۔ پنچایت میں متفقہ طور پر فیصلہ کیا گیا کہ کسان جمعہ کو نوئیڈا اتھارٹی میں بورڈ میٹنگ نہیں ہونے دیں گے، جب تک کہ ان کے مطالبات سے متعلق تجاویز کو بورڈ میٹنگ میں شامل نہ کیا جائے تب تک بورڈ میٹنگ نہیں ہونے دیں گے۔
بھارتیہ کسان پریشد کے صدر سکھ ویر پہلوان نے کہاکہ نوئیڈا اتھارٹی ایک طویل عرصے سے کسانوں کو یقین دہانی کراتی رہی ہے، لیکن ان کے مطالبات ابھی تک پورے نہیں ہوئے ہیں۔ اب کسان اپنے مطالبات پورے ہونے کے بعد ہی تحریک ختم کریں گے۔
- مزید پڑھیں: کسان تحریک کو دس سال بھی چلانی پڑے تو ہم چلائیں گے: راکیش ٹکیت
- نوئیڈا: کسانوں کا نیم برہنہ مظاہرہ، پولیس سے دھکا مکی
کسان جمعہ کو نوئیڈا اتھارٹی کی بورڈ میٹنگ بھی نہیں ہونے دیں گے، جب تک کسانوں کے مطالبات اس میں شامل نہیں ہوں گے۔ اس کے لیے کسان نوئیڈا اتھارٹی کا گھیراؤ کریں گے اور پہیہ جام کریں گے۔ اس مظاہرے میں نوجوانوں اور خواتین کی بڑی تعداد بھی شرکت کرے گی۔ نوئیڈا کے تمام 81 دیہات کے کسان احتجاج میں حصہ لے رہے ہیں اور یہ مظاہرہ تاریخی ہوگا۔