الیکشن کمیشن نے سنی دیول کو انتخابی مہم کے دوران مقررہ حد سے زیادہ رقومات خرچ کرنے کے معاملے میں نوٹس بھیجا ہے اور ان سے وضاحت طلب کی ہے۔
الیکشن کمیشن نے انتخابی مہم کے لیے فی امیدوار مجموعی طور پر 70 لاکھ روپے خرچ کرنے کی حد مقرر کی ہے اور اگر کوئی اس سے زائد رقم انتخابی مہم کے دوران خرچ کرتا ہے تو اس پر قانون کے تحت کارروائی کی جا سکتی ہے۔
قابل ذکر بات یہ ہے کہ اگر کوئی امیدوار انتخابات میں جیت جاتا ہے لیکن اس نے مقررہ حد سے زیادہ رقومات خرچ کی ہے۔ یہ ثابت ہونے پر الیکشن کمیشن اس کی رکنیت منسوخ کر سکتا ہے اور دوسرے مقام پر آنے والے امیدوار کو وہ رکنیت حاصل ہو سکتی ہے۔
تفصیلات کے مطابق سنی دیول نے انتخابی مہم کے دوران 86 لاکھ سے زائد روپے خرچ کیے ہیں جس کے بعد الیکشن کمیشن نے انہیں نوٹس بھیجا ہے اور وضاحت طلب کی ہے۔
اس ضمن میں سنی دیول کے قانونی مشیر کا کہنا ہے کہ 'الیکشن کے خرچ کا جائزہ لینے میں انتخابی کمیشن کی ٹیم سے غلطی ہوئی ہے۔ جلد ہی الیکشن آبزرور کو جانچ کرنے کے بعد خرچ کی صحیح جانکاری دے دی جائے گی۔'
