دہلی پولیس کے مطابق کرائم برانچ نے دہلی فسادات کے سلسلہ میں خالد سیفی نامی شخص کو گرفتار کیا ہے۔ پولیس نے مزید بتایا کہ سیفی کو دہلی فسادات کے سلسلہ میں دائرکی گئی ایک اور چارج شیٹ میں بھی ملزم کے طور پر نامزد کیا گیا ہے۔
اطلاعات کے مطابق خالد سیفی شاہین باغ احتجاج میں 8 جنوری کو شریک ہوئے تھے جہاں شہریت ترمیمی قانون کے خلاف احتجاجی مظاہرہ منظم کیا گیا تھا۔
فروری میں شہریت ترمیمی قانون کی حمایت اور مخالفت میں دو گروپوں کے درمیان تصادم کے بعد شمال مشرقی دہلی میں تشدد پھوٹ پڑا تھا۔ دہلی فسادات میں زائداز 53 افراد ہلاک ہوگئے تھے جبکہ سینکڑوں افراد زخمی بھی ہوئے تھے۔
واضح رہے کہ دہلی پولیس کی کاروائی پر بعض سماجی تنظیموں نے تشویش کا اظہار کیا ہے۔ ان کے مطابق دہلی پولیس سی اے اے مخالفین کو چن چن کر نشانہ بنارہی ہے۔
