دہلی پولیس کے ہیڈ کانسٹیبل کی کورونا سے موت

دارالحکومت دہلی کے مغربی وہار تھانے میں تعینات ایک ہیڈ کانسٹیبل کی کورونا انفیکشن کی وجہ سے موت ہوگئی ہے۔

پولیس کے مطابق جگر سے متعلق دقت کی وجہ سے ہیڈ کانسٹیبل کو ہسپتال میں داخل کرایا گیا جہاں 25 جون کو ان کی کورونا رپورٹ مثبت آئی۔ منگل کو انہوں نے آخری سانس لی۔

یوگیندر تقریبا 15 برس قبل دہلی پولیس میں بھرتی ہوئے تھے، تب سے مختلف جگہوں پر ان کی تعیناتی ہوئی۔ وہ ہریانہ کے مہندر گڑھ کے رہائشی تھے اور یہاں کے مغربی وہار پولیس کوارٹرز میں کنبہ کے ساتھ رہ رہے تھے۔ ان کی موت سے پورا محکمہ پولیس حیران ہے۔ منگل کے روز یوگیندر کی آخری رسومات بھی ادا کی گئیں۔

واضح رہے کہ کورونا سے دہلی پولیس کے اب تک 10 جوانوں کی موت ہوچکی ہے۔ تقریباً 2000 پولیس اہلکار متاثر پائے گئے جن میں سے 1300 ٹھیک ہوچکے ہیں۔دارالحکومت میں گزشتہ 24 گھنٹوں کے دوران کورونا سے 50 افراد کی موت ہوگئی اور متاثر ہوئے افراد کی کل تعداد ایک لاکھ سے زیادہ ہوچکی ہے۔