نئی دہلی: دہلی حکومت نے لوگوں کو آلودگی سے بچانے کے مقصد سے قومی دارالحکومت میں یکم جنوری 2023 تک پٹاخوں کی تیاری، ذخیرہ کرنے، فروخت کرنے اور استعمال کرنے پر مکمل پابندی عائد کر دی ہے۔ اس بار پٹاخوں کی آن لائن فروخت اور ترسیل پر بھی پابندی ہوگی۔ Delhi govt On Firecrackers
دہلی کے ماحولیات اور جنگلات کے وزیر گوپال رائے نے بدھ کو ٹویٹ کرکے یہ اطلاع دی۔ رائے نے کہا کہ دہلی میں آلودگی کے خطرے سے عوام کو بچانے کے لیے گزشتہ سال کی طرح اس بار بھی ہر قسم کے پٹاخوں کی تیاری، ذخیرہ کرنے، فروخت کرنے اور استعمال کرنے پر مکمل پابندی لگا دی گئی ہے تاکہ لوگوں کی زندگیاں بچائی جا سکیں۔ اس بار دہلی میں پٹاخوں کی آن لائن فروخت اور ترسیل پر بھی پابندی ہوگی۔
یہ پابندی یکم جنوری 2023 تک نافذ رہے گی۔ انہوں نے کہا کہ پابندی کو سختی سے نافذ کرنے کے لیے دہلی پولیس، دہلی آلودگی کنٹرول کمیٹی (پی ڈی سی سی) اور محکمہ محصولات کے ساتھ مل کر ایک ایکشن پلان تیار کیا جائے گا۔
رائے نے کہا کہ دہلی حکومت کے کئی محکموں نے سردیوں کے دوران آلودگی کے خطرے کو روکنے کے لئے ایک ایکشن پلان پرملاقات کی اور 15 نکات پر تبادلہ خیال کیا۔
یو این آئی
