مرکزی اور ریاستی حکومت کی پالیسیوں کے خلاف دھرنے پر بیٹھے ہوئے انیل کمار چودھری نے ای ٹی وی بھارت کے ساتھ خصوصی گفتگو کے دوران کہا کہ دہلی کی عوام دونوں حکومت کی غلط پالیسیوں کی وجہ سے پریشان ہے۔ نہ ہی ان کا علاج ہو رہا ہے اور نہ ہی وہ ہسپتال میں ٹیسٹ کرا پارہے ہیں۔ جس کی وجہ سے دہلی کانگریس دھرنے پر بیٹھنے پر مجبور ہے۔ انہوں نے کہا کہ ہم نے دہلی حکومت کو کہا تھا یا تو آپ سڑکوں پر نکل کر لوگوں کی مدد کریں ورنہ ہم سڑکوں پر آجائیں گے۔
ارویند کیجریوال کے سوریہ ہوٹل کے دورے کے سوال پر انیل چودھری نے کہا کہ میں آپ سے اس بارے میں معلومات حاصل کر رہا ہوں۔ اگر وزیر اعلی ہوٹل کا معائنہ کرنے جارہے ہیں تو اچھی بات ہے۔ میرے خیال میں ہمارا دھرنا موثٔر ثابت ہو رہا ہے۔ وزیر اعلی کو نہ صرف ہوٹل بلکہ عام لوگوں سے بھی ملاقات کرنی چاہئے اور علاقے کے لوگوں کو سہولیات فراہم کی جانی چاہئے جو کورونا سے زیادہ متاثر ہیں۔
دہلی کے وزیر صحت ستیندر جین کی صحت سے متعلق ایک سوال کے جواب میں، انیل کمار چودھری نے کہا کہ میں دعا کرتا ہوں کہ ستیندر جین جلد صحت یاب ہوجائیں۔ انہوں نے کہا کہ ہم دعا کرتے ہیں کہ ان کی کورونا رپورٹ منفی آئے اور وہ جلد ہی ہسپتال سے فارغ ہونے کے بعد دہلی کی عوام کی خدمت کریں۔
