میونسپل کارپوریشن آف دہلی(ایم سی ڈی) صفائی ملازمین کے ہڑتال پر ہونے کی وجہ سے سڑکوں پر صفائی نہیں ہو پا رہی اور گھروں سے نکلنے والا کچرا سڑکوں کی زینت بنے ہوئے کوڑے کے انبار میں اضافہ کر رہا ہے۔
قومی دارالحکومت دہلی میں تنخواہ نہ ملنے سے ناراض ایم سی ڈی کے ملازمین غیر معینہ مدت کے لیے ہرتال پر ہیں جس کی وجہ سے پوری دہلی کوڑے کے ڈھیر میں تبدیل ہوگئی ہے۔
دہلی کی کیجریوال حکومت اور ایم سی ڈی کی اس نورا کشتی کے درمیان سب سے زیادہ مصیبتوں کا سامنا عوام کو کرنا پڑ رہا ہے۔ سڑکوں پر چلنے کے لیے بھی جگہ نہیں ہے ہر طرف کچرے نظر آرہے ہیں۔
ای ٹی وی بھارت کے نمائندے نے فصیل بند شہر کے ترکمان گیٹ علاقے کے لوگوں سے بات کی جس میں لوگوں نے بتایا کہ 'صفائی ملازمین کو چاہے دہلی حکومت پیسہ دے یا ایم سی ڈی، انہیں اس سے کوئی مطلب نہیں ہے بس ان کی مساجد، دکانوں اور گھروں کے باہر کوڑے کا ڈھیر نہیں لگنا چاہیے۔
