دہلی اسمبلی انتخابات کے لیے پولنگ کا عمل پرامن طور پر اختتام پذیر ہوا جبکہ چند پولنگ اسٹیشنز پر ابھی بھی ووٹنگ جاری ہے۔
اس دوران الیکشن کمیشن آف انڈیا کی جانب سے پریس کانفرنس میں فراہم کی گئی معلومات کے مطابق اب تک 57.68 فیصد ووٹنگ ہوئی ہے جبکہ پولنگ ابھی بھی جاری ہے، حالانکہ سنہ 2015 میں ہوئے اسمبلی انتخابات میں 67.12 فیصد رائے دہندگان نے حق رائے دہی استعمال کیا تھا۔
سب سے زیادہ ووٹنگ کا فیصد مٹیا محل حلقہ اسمبلی میں درج کیا گیا جہاں کا پولنگ فیصد 68.36 رہا ہے جبکہ دیگر مسلم اکثریتی علاقوں کی بات کی جائے تو وہاں بھی ووٹنگ کا فیصد کافی بہتر رہا تاہم دہلی کینٹ میں سب سے کم ووٹنگ یعنی 39.52 فیصد درج کیا گیا۔
واضح رہے کہ بلی ماران حلقہ اسمبلی میں 58 فیصد، مصطفیٰ آباد حلقہ اسمبلی میں 66 فیصد، سیلم پور حلقہ اسمبلی میں 60 فیصد اور اوکھلا حلقہ اسمبلی میں 51 فیصد ووٹنگ ہوئی ہے جبکہ مزید ووٹنگ جاری ہے۔
اس کے علاوہ الیکشن کمیشن آف انڈیا کی جانب سے کچھ اور اعداد و شمار میڈیا کے ساتھ شیئر کیے گئے ہیں ان میں 80 برس کی عمر سے زائد رائے دہندگان کی تعداد جو پولنگ اسٹیشن تک نہیں پہنچ سکی انہیں گھر پر ہی اپنا حق رائے دہی استعمال کرنے کی سہولت فراہم کی گئی، اس سہولت کا فائدہ اٹھانے والے بزرگوں کی تعداد 2257 رہی جبکہ 488 معذور ووٹرز میں سے 429 نے ووٹرز نے گھر بیٹھے ووٹ دیا۔
