کورونا وائرس کی وجہ سے عوامی لاک ڈاون کے مدنظر دہلی پولیس کی مداخلت کے بعد تبلیغی جماعت نے اپنی سرگرمیوں کو محدود کر دیا ہے۔ باہر سے آنے والی جماعتوں کو اپنے اپنے مقامات پر رکنے کی ہدایت جاری کی گئی ہے۔
مرکز نے بڑے دروازے بند کر دئے ہیں جبکہ چھوٹے دروازے سے ضرورت پڑنے پر آنے جانے کی اجازت دی جا رہی ہے۔ فی الحال مرکز میں کتنے لوگ قیام پذیر ہیں اس کے اعداد و شمار طلب کرنے پر فراہم نہیں کرائے گئے۔
تبلیغی جماعت سے وابستہ ایک ذمہ دار نے بتایا کہ یہاں پر تمام احتیاطی تدابیر اختیار کی جارہی ہیں۔ ڈاکٹرز موجود ہیں۔ صفائی کا باقاعدہ نظم ہے۔
قابل ذکر بات یہ ہے کہ دہلی میں واقع مرکز حضرت نظام الدین دنیا بھر میں پھیلے دعوت و تبلیغ کے کام کاج کا مرکز ہے، جہاں سال بھر تل دھرنے کو جگہ نہیں ہوتی۔ درجنوں جماعتیں واپس آتی ہیں اور روانہ ہوتی ہیں۔ لیکن کورونا وائرس کی وجہ سے جماعت کی نقل کو روک دیا گیا ہے۔ جو جماعتیں بن رہی تھیں اسے روک دیا گیا۔ جو جماعتیں دوران سفر تھیں، انہیں اپنے اپنے مقامات پر رکنے کے لیے کہا گیا ہے۔ اس کے باوجود بڑی تعداد میں لوگ ابھی بھی مرکز میں موجود ہیں۔
