کانگریس ذرائع نے پیر کےروز یہاں بتایا کہ 'ملک میں آئین کی دھجیاں اڑائی جارہی ہیں اس لیے پارٹی آئین کی بے حرمتی کرنے والی حکومت کے یوم آئین کی تقریب میں حصہ نہیں لے گی۔'
انھوں نے کہا کہ 'مودی حکومت نے اتراکھنڈ، کرناٹک اور گوا سمیت کئی ریاستوں میں مسلسل آئین کو کچلا ہے اور اس کی تازہ مثال مہاراشٹر ہے جہاں ناجائز طریقہ سے حکومت تشکیل دی گئی ہے۔'
واضح رہے کہ ملک کے آئین کے 70سال مکمل ہونے کے موقع پر منگل کے روز پارلیمنٹ کے سنٹرل ہال میں خصوصی تقریب منعقد کی گئی ہے جس سے صدر جمہوریہ رام ناتھ کووند ،نائب صدر جمہوریہ ایم وینکیانائیڈو ،لوک سبھا اسپیکر اوم برلا اور وزیراعظم نریندرمودی خطاب کریں گے ۔
کانگریس نے پارلیمنٹ کے دونوں ایوانوں میں آج مہاراشٹر کے معاملہ پر جم کر ہنگامہ کیاجس کی وجہ سے دونوں ایوانوں کی کارروائی دن بھر کے لیے ملتوی کردی گئی ۔کانگریس کے ارکان نے پارلمینٹ کی کارروائی شروع ہونے سے پہلے پارلیمنٹ ہاؤس کے احاطہ میں بابائےقوم مہاتما گاندھی کے مجسمہ کے سامنے دھرنا دیا اور مظاہر ہ کیا۔
