ریاست ہریانہ میں میڈیکل طلبہ کی فیس میں غیر معمولی اضافے کا فیصلہ کیا جا چکا ہے۔ حکومت کے اس فیصلے سے جہاں طلبہ فکرمند ہیں وہیں کانگریس رہنما آفتاب احمد طلبہ کے ساتھ کھڑے دکھائی دے رہے ہیں۔
ان کا کہنا ہے کہ اس طرح اپنی محنت سے ایم بی بی ایس کرنے والے طلبہ پر حکومت حملہ کر رہی ہے۔ اور انہیں تعلیم سے دور کرنا چاہتی ہے۔
اس دوران کانگریس کارکنان عہدہ داروں نے رکن اسمبلی آفتاب احمد کی قیادت میں ڈپٹی کمشنر میوات کی معرفت گورنر ہریانہ کو میمورنڈم سونپا۔ اس میمورنڈم میں کانگریس پارٹی نے مانگ کی ہے کہ بی جے پی و جے جے پی سرکار نے جو میڈیکل میں ایم بی بی ایس کے طلبہ کی فیس 50 ہزار سے بڑھا کر دس لاکھ کی ہے اسے فوراً واپس لیا جائے۔
آفتاب احمد نے کہا کہ کورونا جیسی وبا سے ویسے ہی ہر طبقے کے لوگ پریشان ہیں لیکن صوبائی حکومت طلبہ و سرپرستوں کو لوٹنے کا کام کر رہی ہے۔ جس وقت طلبہ اور دوسرے طبقے کے لوگوں کو رعایت ملنی چاہیے اس میں انہیں لوٹا جارہا ہے۔
آفتاب احمد کہتے ہیں کہ اگر دس لاکھ فیس ہوگی تو کیا غریب مزدور آدمی کا بچہ پڑھ پائے گا۔ انہوں نے کہا کہ کانگریس طلبہ کے ساتھ کھڑی ہے۔ اور یہ نا انصافی بالکل برداشت نہیں کی جائے گی۔
