نئی دہلی: قومی دارالحکومت خطہ (این سی آر) میں جمعہ کے روز سے ہونے والی وقفے وقفے کی بارش کے سبب ہفتہ کی صبح لوگوں کو سردی کا سامنا کرنا پڑا۔ محکمہ موسمیات کے مطابق دارالحکومت میں گزشتہ تین دنوں میں درجہ حرارت میں تقریباً سات ڈگری سیلسیس کی کمی درج کی گئی ہے۔ Rain in Delhi NCR
محکمہ موسمیات نے پہلے ہی ہفتہ اور اتوار کے روز ہلکی بارش کی پیش گوئی کی تھی۔ جمعہ کی دوپہر سے ہی دہلی-این سی آر میں سیاہ بادل دکھائی دینے لگے تھے۔ کئی علاقوں میں گزشتہ رات سے ہلکی بارش کا سلسلہ جاری ہے۔ محکمہ کے مطابق مطلع ابر آلود رہنے کے ساتھ موسم کی صورتحال کو مدنظر رکھتے ہوئے دارالحکومت میں چار سے پانچ روز تک بارش ہوسکتی ہے۔ محکمہ نے 8 سے 12 اکتوبر کے درمیان بوندا باندی اور ہلکی بارش کی پیش گوئی کی ہے۔
واضح ر ہے کہ مانسون نے 29 ستمبر کو راجدھانی سے واپسی شروع کی ہے اور مانسون کے بعد یہ پہلی بارش ہوگی۔ یہ بارش خلیج بنگال کے او پر تیار ہونے والے مانسون سسٹم کے اثر ات کی وجہ سے ہوگی۔ اس کے اثر سے دہلی سمیت شمالی ہندوستان کے مختلف مقامات پر بارش ہوگی۔ مسلسل بادل چھائے رہنے اور بارش کی وجہ سے زیادہ سے زیادہ اور کم سے کم درجہ حرارت میں بھی کمی آئی ہے۔ درجہ حرارت میں کمی کا یہ سلسلہ چند روز تک جاری رہے گا۔ محکمہ موسمیات کے مطابق برسات کے بعد زیادہ سے زیادہ درجہ حرارت 27 سے 28 ڈگری کے قریب رہے گا اور اس میں تقریباً چھ ڈگری کی کمی واقع ہوگی۔ کم سے کم درجہ حرارت بھی 20 ڈگری سیلسیس کے آس پاس رہے گا۔
