کورونا وبا کے اس بحرانی دور میں اکثر و بیشتر ملازمین کو تنخواہوں کی عدم ادائیگی کی اطلاعات موصول ہوتی رہی ہیں۔
آج دہلی کی آزاد پور سبزی منڈی میں کام کرنے والے سول ڈیفینس کے لوگ بھی اسی کڑی میں شامل ہوئے ہیں۔ اب ان کا بھی یہی الزام ہے کہ دہلی حکومت گزشتہ تین ماہ سے انہیں تنخواہیں نہیں دے رہی ہے جبکہ ہم لوگ کورونا دور میں بھی صبح 6:00 بجے سے 2:00 بجے تک منڈی میں اپنی ڈیوٹی سرانجام دیتے رہے ہیں۔
سول ڈیفینس کے لوگوں نے الزام عائد کیا ہے کہ انہیں حکومت کی طرف سے کورونا انفیکشن سے بچانے کے لئے کسی بھی طرح کے ماسٹر سینیٹائزر نہیں دیئے جاتے ہیں۔ یہاں کے افسران انہیں دیگر کئی طرح کے کام کرنے پر مجبور کرتے ہیں۔ جب کوئی سامان چوری ہو جاتا ہے تو اس کے لئے بھی ہمیں ہی مورد الزام ٹھہرایا جاتا ہے۔ جمعہ کی صبح یہ لوگ آزاد پور سبزی منڈی کے دفتر کے باہر جمع ہوئے اور حکومت سے تین ماہ کی تنخواہ کا مطالبہ کیا اور افسران کا رویہ درست کرنے کی مانگ کی۔ ان کا کہنا ہے کہ افسران کا رویہ انتہائی بے رحمانہ ہے۔
