بھارت میں ایسے دفاتر جہاں ایک سو سے زیادہ ملازمین ہوں گے وہاں 11 اپریل سے کورونا ٹیکہ کاری کےلیے مرکز قائم کئے جائیں گے۔ محکمہ صحت کے سکریٹری راجیش بھوشن کے مطابق دفاتر میں قائم کئے جانے والے کوویڈ ویکسین سینٹرز پر صرف 45 سال سے زیادہ عمر کے ملازمین کو ہی ٹیکہ دیا جائے گا جبکہ ان مراکز پر ملازمین کے اہل خانہ کے علاوہ کوئی بھی بیرونی شخص ٹیکہ لینے کا اہل نہیں ہوگا۔
دفاتر میں قائم کوویڈ ویکسین سینٹر پر ٹیکہ لینے کےلیے ملازمین کو، کو۔ون پورٹل پر رجسٹریشن کرانا ضروری ہوگا۔ پہلی اور دوسری خوراک میں یکسانیت کےلیے ایسے مراکز پر ایک ہی قسم کی ویکسین دی جائے گی۔
ملک بھر میں گذشتہ یکم اپریل سے 45 سال یا اس سے زیادہ عمر کے ہر فرد کو کورونا ویکسین دی جارہی ہے۔ اب 45 سال سے زیادہ عمر کا کوئی بھی شخص کسی بھی سرکاری یا نجی صحت مرکز میں ٹیکہ لگا سکتا ہے۔