مشاعرے کی روح رواں جشن بہار ٹرسٹ کی بانی کامنا پرساد نے کہا کہ اردو زبان ہماری ہمہ جہت تہذیب کی علامت ہے۔ اپنے طویل ادبی سفر کے دوران اس خالص ہندوستانی زبان نے ساری دنیا کے لوگوں کے دلوں میں خاص جگہ بنائی ہے۔
انہوں نے مزید کہا کہ اپنی مشترکہ تہذیب کی خدمت جاری اور مشاعروں کی روایت کی انفرادیت کا خیال رکھتے ہوئے ہم نے امسال بھی جشن بہار میں مختلف ادبی شخصیات کو مدعو کرنے کی کوشش کی ہے۔
اطلاع کے مطابق بھارت کے سب سے بڑے منفرد اور بین الاقوامی مشاعرہ جشن بہار 2019-کی صدارت ساہتیہ اکادمی ایوارڈ یافتہ ممتاز ادیبہ چترا مدگل کریں گی۔
جبکہ بحیثیت مہمان خصوصی جامعہ ملیہ اسلامیہ کی وائس چانسلر ڈاکٹر نجمہ اختراور ریاست دہلی کے نائب وزیراعلی منیش سسودیا شرکت کریں گے جبکہ نظامت نوجوان شاعر آلوک شریواستو کریں گے۔
مشاعرے میں امریکہ سے ڈاکٹر عبداللہ اور ڈاکٹر نوشہ اسرار، جاپان سے پروفیسر سویمانے، دوحہ قطر سے عزیز نبیل اورابوظہبی سے سید سروش آصف بیرون ملک میں شادوآباد اردو کی بستیوں کی نمائندگی کریں گے۔
جب کہ بھارت کے ممتاز شعرا وشاعرات جن میں پروفیسر وسیم بریلوی، ڈاکٹر نصرت مہدی، راجیش ریڈی، پروفیسر منیو بخشی، پروین کیف، اقبال اشہر، ڈاکٹر نزہت انجم ، لیاقت جعفری، آلوک شریواستو، عبدالرحمان منصور، مدن موہن دانش،اظہر اقبال اور ندیم شاد شامل ہوں گے۔
